भद्रबन्दी गृहय् स्वांयाःपुन्हि

येँ(नेपालभाषा टाइम्स)- बौद्ध शिक्षा तथा सामाजिक विकास केन्द्र नेपालया ग्वसालय् त्रिपुरेश्वरय् च्वंगु भद्रबन्दी गृहय् स्वांयाःपुन्हि हंगु दु । केन्द्रया ग्वसालय् बन्दी गृहय् नियमित ज्याझ्वःकथं भगवान बुद्धया जन्म, संबोधि ज्ञान लाभ व महापरिनिर्वाण प्राप्त यानाबिज्याःगु त्रिसंयोग चूलाःगु २५६७ क्वःगु स्वांयाःपुन्हिया लसताय् उगु ज्याझ्वः जूगु खः ।

केन्द्रया महासचिव विजयरत्न तुलाधरया संयोजकत्वय् बन्दीगृहय् केन्द्रपाखें २०६१ सालय् पलिस्था याःगु बुद्धया देगः परिसरय् स्वांयाःपुन्हिया ज्याझ्वः याःगु खः । केन्द्रपाखें थःपिनिगु नियमित ज्याझ्वःकथं १९ क्वःगु स्वांयाःपुन्हि हंगु खः ।

अखिल नेपाल भिक्षु महासंघया सचिवलिसें विश्व शान्ति विहारया श्रद्धेय भिक्षु निग्रोध महास्थविरं पंचशीलिलसें त्रिरत्न गुण संस्मरण व धर्मदेशना बियाबिज्याःगु खः । थुकथं हे अनागारिका श्रद्धाचारी गुरुमां, वज्रयान महासंघया अध्यक्ष राजेन्द्रमान वज्राचार्य, कारागारया प्रमुख जेलर ललितकुमार बस्नेत, सुरक्षा प्रमुख डिएसपी कुमार विक्रम थापा नं धम्म मन्तव्य तयादीगु खः ।

अनागारिका श्रद्धावति, प्राचार्य तीर्थरत्न शाक्य लगायतया उपस्थिति दुगु ज्याझ्वः बुद्ध मूर्तिइ स्वां देछासे न्ह्याःगु खः । ज्याझ्वलय् केन्द्रया महासचिवलिसें ज्याझ्वःया संयोजक तुलाधरं लसकुस यानादीगु खःसा उपासक विद्यासागर तुलाधरं सुभाय् देछानादीगु खः । ज्याझ्वःया व्यवस्थापन जुजुभाइ तुलाधर, मंगललक्ष्मी तुलाधर व कारागारया आन्तरिक प्रशासनया बन्दीतय्सं याःगु खः ।