नेपालभाषा ब्वनीपिं अप्वल

येँ (नेपालभाषा टाइम्स)÷विद्यार्थी संख्या मगाः धकाः आरआर क्याम्पसय् लि हे कायेधुंकूगु नेपालभाषाया कक्षा पुृनः सञ्चालन यायेधुंकाः आः विद्यार्थी संख्या नं अप्वया वःगु दु । अन अप्वया वःगु विद्यार्थी संख्यां नेपालभाषा ब्वनेज्याय् ल्याय्म्ह पुस्ता सक्रिय जुया वःगु संकेत नं खने दया वःगु दु ।

थनिं १५ महिना न्ह्यः विद्यार्थी संख्या मगाः धासें आरआर क्याम्पसय् बीए तगिमय् नेपालभाषा कक्षा लिकाःगु खः । तर विद्यार्थीतय्गु दबाब व कुतःया लिच्वः कथं अन हानं नेपालभाषा कक्षा सञ्चालन याकेगु जक मखु विद्यार्थीया ल्याः नं धमाधम अप्वया वःगु खँ अन पुनः कक्षा सञ्चालन याकेगु ज्याय् भूमिका म्हितादीम्ह विद्यार्थी रिदेन महर्जनं कनादिल ।

आरआर क्याम्पसं नेपालभाषा कक्षा लिकायेवं महर्जन लगायत मनिष श्रेष्ठ व मेपिं पासापिनि पुचलं हानं नेपालभाषा कक्षा तयेकेगु लागिं पहल याःगु खः । शुरुइ थ्व पहल यायेगु ज्याय् छुं भचा जक विद्यार्थी लगे जूगु खःसां लिपा उकिया ल्याः अप्वया वःगु खः ।
थौकन्हय् अन बीए तगिंया न्हापांगु व निगूगु दँ समेत यानाः २५ म्ह विद्यार्थीतय्सं ब्वनाच्वंगु दु । अन नेपालभाषा ब्वंकेगु ज्या प्रा.डा. चन्द्रमान वज्राचार्यं याना च्वनादीगु दु ।

विद्यार्थी संख्या अप्वया वःगुलिं आः क्याम्पसय् नेपालभाषा कक्षा हानं लिकाये मालीगु अवस्था मवइगु खँ सहायक क्याम्पस प्रमुख गोविन्द आचार्यं कनादीगु दु । ब्वनीपिं विद्यार्थीत हे मदयाः अन स्वदँ प्यदँ कक्षा हे सञ्चालन मजूगु खःसा वयां लिपा क्याम्पसं नेपालभाषा विषय हे लिकया छ्वयेगु निर्णय याःगु खः । थौंकन्हय् धाःसा अन नेपालभाषा कक्षाय् वइपिंत भर्ना कायेत छुं रोकतोक मदुगु व कक्षा नं बांलाक न्ह्यानाच्वंगु खँ वय्कलं कनादीगु दु ।

क्याम्पसय् पुनः नेपालभाषा कक्षा सञ्चालन याकेत शिक्षण ख्यःलिसे सम्बन्धित नेवाः न्ह्यलुवापिं, अनया स्ववियु पदाधिकारीपिं लिसें नेवाः आन्दोलनया न्ह्यलुवापिंसं नं लगातार पहल याःगु खःसा उकिया हे लिच्वः कथं क्याम्पस प्रशासन बाध्य जूगु खः ।
न्हापा आरआर क्याम्पसया नेपाल भाषा विद्यार्थीतय्सं सुकुन्दा साहित्य पाःलाः स्वनाः ज्या यानाच्वंगु खः ।

सम्बन्धित बुखँ

LEAVE YOUR COMMENTS