छन्हुं स्वंगू बन्दीगृहय् धर्मदेशना

येँ- बौद्ध शिक्षा तथा सामाजिक केन्द्र नेपालं थनया लुँहितिस्थित जगन्नाथ देगः परिसरय् च्वंगु स्वंगू बन्दीगृहया बन्दीतय् निंतिं धर्मदेशना ज्याझ्वः याःगु दु । केन्द्रं जगन्नाथ देगः परिसरय् च्वंगु भद्र बन्दीगृह, केन्द्रीय कारागार व महिला बन्दीगृहया बन्दीतय् निंतिं उगु धर्मदेशना ज्याझ्वः याःगु खः ।

केन्द्रपाखें २०६० सालनिसें कारागार दुने च्वंपिं बन्दीतय् निंतिं थुकथंया धार्मिक व सामाजिक ज्याझ्वःयात निरन्तरता बीगु झ्वलय् २०७० सालनिसें लुँहितिइ च्वंगु जगन्नाथ देगः परिसरया बन्दीगृहय् च्वंपिनिगु निंतिं लाया न्हापांगु व स्वंगू शनिवाः यानाः लय् निक्वः नियमित रुपं धर्मदेशना व प्रवचन ज्याझ्वः याना वयाच्वंगु दु । थ्व झ्वलय् वंगु असार ४ गते न्हापांगु शनिवाः स्वंगुलिं बन्दीगृहय् च्वंपिं बन्दीतय् निंतिं उगु ज्याझ्वः याःगु खः ।

ज्याझ्वःकथं केन्द्रीय कारागारय् जूगु ज्याझ्वलय् भिक्षु विमलों प्रवचन बियाबिज्याःगु खः । धर्म पासा विद्यासागर तुलाधरं लसकुस यासें न्ह्याःगु ज्याझ्वलय् भावी ज्याझ्वः बारे केन्द्रया महासचिवलिसें ज्याझ्वःया संयोजक विजयरत्न तुलाधरं जानकारी बियादीगु खःसा बन्दीतय्पाखें फुरी शेर्पा व ग्वसाः खलःपाखें बोधि टेलिभिजनया वरिष्ठ क्यामरापर्सन हरि लोहनीं सुभाय् देछानादीगु खः ।

थुकथं हे भद्र बन्दीगृहय् जूगु ज्याझ्वलय् विश्वशान्ति विहारया श्रद्धेय भिक्षु जनकं प्रवचन बियाबिज्याःगु खःसा केन्द्रया महासचिवलिसें ज्याझ्वः संयोजक तुलाधरं लसकुस यानादीगु खः । ज्याझ्वलय् बन्दीतय्पाखें संजय लामां सुभाय् देछनादीगु खः ।

महिला बन्दीगृहय् डाकिला गुरुमां नं प्रवचन बियाबिज्याःगु खःसा ज्याझ्वलय् लसकुस नापं विषययात कयाः ज्याझ्वःया सहयोगी नानीशोभा मानन्धरं जानकारी बियादीगु खःसा समाजसेवी सुलोचना मानन्धरं सुभाय् देछानादीगु खः ।

सम्बन्धित बुखँ

LEAVE YOUR COMMENTS