आः प्रमुख प्रतिपक्षी अदालतं क्वःछी

येँ (नेपालभाषा टाइम्स)- प्रतिनिधि सभाय् विपक्षी दलया नेता सु जुइ धइगु बारे न्यायिक परीक्षण जुइगु जूगु दु । कांग्रेस संसदीय दलया नेता शेरबहादुर देउवा विपक्षी दलया नेता जुइ मफइगु दावी यासें दायर याःगु रिट म्हिगः सर्वोच्च अदालतय् दर्ता जूगु खः ।

अधिवक्ता विमलप्रसाद पोखरेलं पेश याःगु रिटयात उकुन्हु अदालतया प्रशासनं संसदीय काम कारबाहीया खँय् न्यायिक परीक्षण जुइ फइ मखु धासें दरपीठ याःगु खः । दरपीठ आदेश विरुद्ध लाःगु निवेदनया म्हिगः सुनुवाइ यासें सर्वोच्च अदालतया न्यायाधीश सपना प्रधान मल्लं उगु निवेदन दर्ता यायेत आदेश बिउगु खः ।

नेपाली कांग्रेसं प्रधानमन्त्री पुष्पकमल दाहालयात प्रतिनिधिसभाय् विश्वासया मत बिउगुलिं संसदीय दलया नेता शेरबहादुर देउवायात प्रमुख विपक्षी दलया नेताया मान्यता बी मजिउगु दावी सहित रिट निवेदन दर्ता याःगु खः ।

सर्वोच्च अदालतं थौं निवेदनयात कयाः प्रारम्भिक सुनुवाइ याइगु जूगु दु । रिट निवेदनय् देउवाया लिसें संघीय संसद सचिवालय, सभामुख, संवैधानिक परिषद् व कांग्रेस संसदीय दलया कार्यालययात नं विपक्षी दयेकातःगु दु ।