बुद्ध जयन्ती तःजिक हन
येँ (नेपालभाषा टाइम्स)÷२५६७ क्वःगु बुद्ध जयन्ती देय्न्यंकं थीथी ज्याझ्वः यासें न्यायेकल । थ्व झ्वलय् दकलय् विशेष रुपं जन्मभूमि लुम्बिनी व येँय् ज्याझ्वःत जूगु खः ।
येँय् बुद्ध जयन्ती समारोह समितिपाखें आनन्दकुटी विहारय् विशेष समारोह यात । समारोहय् उपराष्ट्रपति रामसहासप्रसाद यादवं मूपाहां कथं ब्वति कयादीगु खः ।
अथे हे म्हिगः येँय् बुद्धया अस्थि धातुयात देय्चाःहीकेगु ज्या नं जुल । येँया चकं दबुलिंनिसें बाजागाजा सहित अस्थियात बग्गीइ तयाः येँया थीथी लागा चाःहीकेगु ज्या जूगु खः । अस्थि धातुया शोभायात्रा श्रीघः विहारय् थ्यंकाः क्वचायेकूगु खः ।
अथे हे यलय् नं म्हिगः भिंछेबहालं बुद्धया मूर्तियात क्वबियाः चाःहीकुसें बुद्ध जयन्ती न्यायेकल । उगु शोभा यात्राय् यलया आपालं खलः पुचःतय्सं ब्वति काःगु खः ।
अथे हे येँया स्वयम्भूइ नं म्हिगः सुथंनिसें बुद्ध पूजा, ज्ञानमाला भजन लिसें खीर दानया ज्या जूगु खः । अथे हे ख्वपय् नं थीथी विहारय् दानप्रदान, धर्मदेशना यासें बुद्ध जयन्ती हनेगु ज्या जूगु खः ।
प्रधानमन्त्री दाहालं लुम्बिनी, कपिलवस्तु, देवदह व रामग्रामय् दुगु ऐतिहासिक व पुरातात्विक महत्वया सम्पदाया संरक्षण व उगु क्षेत्रया दिगो विकास यासें बृहत्तर लुम्बिनी क्षेत्रय् रुपय् न्ह्यःने न्ह्याकेगु खँ धयादीगु दु । लुम्बिनीइ म्हिगःनिसें हर्न निषेध यायेगु ज्याझ्वः नं शुरु जूगु दु ।
बुद्ध जयन्तीया लसताय् म्हिगः राष्ट्रपति रामचन्द्र पौडेल, पुलांम्ह राष्ट्रपति विद्यादेवी भण्डारी, एमाले अध्यक्ष केपी शर्मा ओली लगायत थीथी व्यक्तित्वपिंसं भिंतुना सन्देश नं बियादीगु खः ।
LEAVE YOUR COMMENTS