काबुल विमानस्थलयात लक्षित यानाः रकेट प्रहार

एजेन्सी- काबुलय् च्वंगु अन्तर्राष्ट्रिय विमानस्थलयात लक्षित यानाः सोमवाः न्यागः रकेट प्रहार जूगु दु । अन्तर्राष्ट्रिय सञ्चार माध्यमयाकथं रकेट आक्रमणयात अमेरिकाया एन्टी मिसाइल सिस्टमं दथुइ हे नष्ट यानाबिउगु खः । रकेट आक्रमण सुनां याःगु धयागु पुष्टि मजूनि । आक्रमणं यानाः क्षति जूगु समाचार नं वःगु मदुनि ।

मेखे अमेरिकां आइतवाः राजधानी काबुलय् हाकनं ड्रोन हमला याःगु दु । अमेरिकी सेनां मेगु आतंकवादी हमलायात पनेत ड्रोन हमला यानागु जानकारी बिउगु खः । अमेरिकी सेनां इस्लामिक स्टेटयात निशाना दयेकाः हमला यानागु नं धाःगु दु । समाचार संस्था सिएनएनया कथं अमेरिकां याःगु ड्रोन हमलाय् छखा हे छेँयापिं खुम्ह मस्त यानाः गुम्ह मनूत सीगु दु । तालिबानं अमेरिकां याःगु ड्रोन हमलायात गैरकानुनी धाःगु दु ।

वंगु बिहिवाः इस्लामिक स्टेट–कें काबुल विमानस्थलय् आत्मघाती विस्फोट याःगु खःसा थुकी लानाः १७० म्ह मनू सीगु खः । अथेहे द्वःछिसिबें अप्वः मनूत घाःपाः जूगु खः । विमानस्थलय् जूगु हमलाया लिसलय् अमेरिकां इस्लामिक स्टेट–के च्वनाच्वंगु थासय् ड्रोन हमला याःगु खःसा थुकी लानाः काबुल विमानस्थल हमलाया प्रमुख योजनाकार सीगु दाबी नं याःगु खः ।

अमेरिकां अफगानिस्तानं थः नागरिकतय्गु उद्धार यानाच्वंगु दनि । तालिबानं अमेरिकायात उद्धारया निंतिं अगस्ट ३१ तकया ई बियातःगु दु । थ्व ई मंगलवाः क्वचाइ । अगस्ट ३१ मंगलवाः तकया दुने दक्वं विदेशी सेनां अफगानिस्तान त्वःतेमाःगु सहमति अमेरिका व तालिबानया दथुइ जूगु खः ।

सम्बन्धित बुखँ

LEAVE YOUR COMMENTS