ने. सं. ११४६ पाेहेलागा एकादशी - षट्रतिला एकादशि

सहकारी पीडित हानं सतकय्

येँ (नेपालभाषा टाइम्स)- सरकारं थःपिंत बेवास्ता यासें माग सम्बोधन मयाःगु धासें सहकारी पीडिततय्सं हाकनं वृहत राष्ट्रिय आन्दोलन याइगु जूगु दु । सहकारी बचतकर्ता संरक्षण राष्ट्रिय अभियानं म्हिगः विज्ञप्ति पिकासें सरकारं बचतकर्ताया ध्यबा लितबीगु जिम्मा मकाःतले थःपिनिगु ध्यबा लिहां वइगु अवस्था खनेमदु धासें आन्दोलन यायेमाःगु अवस्था वःगु खँ धाःगु दु ।

सरकारं थःपिनिगु ध्यबा लित बीत गम्भीर जुइमाः धासें वइगु मंसिर ५ गते थःपिं निर्णायक आन्दोलनया नितिं सतकय् कुहां वयेत बाध्य जूगु खँ विज्ञप्तिइ धयातःगु दु । सहकारी पीडिततय्सं वंगु बुधवाः डेपुटी गभर्नर सहित च्वंगु क्याबिनेट बैठकय् सहलहया झ्वलय् थःपिनिगु प्रतिनिधि मतसे सम्झौता याःगु द्वपं नं बिउगु दु । उमिसं पटक पटक सम्पर्क यानाः नं सरकारी पक्ष सम्पर्कय् मवःगु द्वपं नं बिउगु दु ।