ने. सं. ११४३ ञलागा चौथी -

नेपाः एशिया कपया निंतिं छनोट

येँ (नेपालभाषा टाइम्स)- नेपाः एसिसि प्रिमियरशीप कपय् युएईयात बुकुसें एशिया कपया निंतिं छनौट जूगु दु । थौं टियु मैदानय् जूगु कासाय् युएईयात ७ बिकेटं बुकसें नेपाः २१ दँ लिपा एशियाकपया निंतिं छनोट जूगु खः । नेपालं न्हापांखुसी सन् २००२ य् एशिया कपय् थ्यंगु खः । तर उबलय् एशिया कप धेंधेंबल्लाः हे मजूगुलिं नेपालं म्हिते हे मखन । उबलय् भारत व पाकिस्तान दथुइ विवाद जुयाच्वंगुलिं धेंधेंबल्लाः हे रद्द जूगु खः । थुगुसी एशिया कप पाकिस्तानय् जुइत्यंगु दु । यदि भारतं पाकिस्तान वनाः म्हितेमखु धकाः विवाद पिकाल धाःसा नेपाःया एशिया कप म्हितेगु म्हगस लिज्यां वनेफु ।

थुगुसी एशिया कप वइगु सेप्टेम्बरय् पाकिस्तानय् जुइ । समूह ए भारत पाकिस्तान लिसें नेपाः लाःगु दुसा समूह बीइ बंगलादेश, श्रीलंका व पाकिस्तान दु ।
सोमवाः जूगु फाइनल कासा वा वयाः दिकेमाःगुलिं थौं टियु मैदानय् ल्यं दनिगु कासा जूगु खः । थौं जूगु कासाय् युएईया ल्यं दनिगु छगू विकेट कायेधुंकाः नेपालं ब्याटिङ यासें ३०.३ ओभरय् ३ विकेटया क्षतिइ ११८ रन दयेकूसें विजय लक्ष्य पूवंकूगु खः ।

नेपाःया निंतिं गुलसन झा नं अविजित ६७ रन दयेकलसा भीम साकिं ३६ रनया योगदान बिल । झा नं ८३ बल म्हिताः प्यंगू चौका व खुगू छक्का थ्वाःगु खः ।

नेपाःया नं सुरुवात बांमलाक हे जूगु खः । निगूगु ओभरया निगूगु बलय् हे नेपाःया ओपनर कुशल भुर्तेल १ रन जक दयेकूगु अवस्थाय् एलबीडब्ल्यू आउट जूगु खः । अथेहे न्हय्गूगु ओभरय् मेम्ह ओपनर आसिफ शेख ८ रन जक दयेकूगु अवस्थाय् एलबीडब्ल्यू आउट जुलसा च्यागूगु ओभरया अन्तिम बलय् कप्तान रोहित पौडेल १ रनय् हे बोल्ड आउट जूगु खः । नेपाःया स्वंगू विकेट वंगु अवस्थाय् २२ रन जक दुगु खः । युएईया निंतिं स्पिनर रोहन मुस्तफां निगू विकेट काःगु खःसा आयन खानं छगू विकेट काःगु खः ।

म्हिगः युएई ब्याटिङ यानाः गुंगू विकेटया क्षतिइ १०६ रन दयेकूगु अवस्थाय् कासा स्थगित यायेमाःगु खः । थ्व हे अवस्थां निसें सुरु जूगु कासाया झ्वलय् युएईया अन्तिम विकेट ११ रन दयेकाः आउट जूगु खः । युएईया अन्तिम विकेट ललित राजवंशीं काःगु खः ।

नेपाःया निंतिं राजवंशीं प्यंगू, सन्दीप व करण केसीं निगू निगू, सोमपाल कामी व गुलशन झां नं छगू छगू विकेट काःगु खः ।