जर्मनीयात बुंकाः इंग्ल्यान्ड युरो कपया क्वार्टरफाइनलय्

येँ– रहिम स्ट्रलिङ व कप्तान ह्यारि केनया छगू छगू गोलया ग्वाहालिं इंग्ल्यान्ड जर्मनीयात बुकाः युरो कपया क्वार्टर फाइनलय् दुहां वंगु दु ।

मंगलवाः बहनी जूगु कासाया न्हापांगु हाफय् निगुलिं टिमं गोल जुइमफुगु खःसा निगूगु हाफया ७५ औं मिनेटय् स्ट्रालिङं इंग्ल्यान्डया निंतिं गोल यासें अग्रता बिउगु खः । थुगुसीया युरो कपय स्ट्रलिङया थ्व स्वंगूगु गोल खः । थ्वयां झिगू मिनेट लिपा कप्तान केनं थप छगू गोल यासें इंग्ल्यान्डया निंतिं विजय सुनिश्चित यानाबिउगु खः ।

इंग्ल्यान्डया वेम्ब्ले मैदानय् जूगु थ्व कासा जर्मनी विरुद्ध इंग्ल्यान्डया ताःई लिपाया विजय खः । वेम्ब्लेय् जर्मनीविरुद्ध जूगु न्हय्गू कासा लिपा थ्व पालय् बल्ल इंग्ल्यान्डं त्याके फुगु खः । अथेहे युरोकपया इतिहासय् सन् १९६६ लिपा इंग्ल्यान्डं जर्मनीयात नकउआट चरणय् बुकूगु थ्व हे न्हापांखुसी खः ।

मेखे थ्व विजय इंग्ल्यान्डया प्रशिक्षक साउथगेटया निंतिं विशेष जूगु दु । सन् १९९६ य् साउथगेट कासामि जुयाच्वंगु इलय् वेम्बलय् जूगु युरोकपया फाइनल कासाय् साउथगेटं पेनाल्टिइ गोल यायेमफयेवं इंग्ल्यान्ड उपाधी त्याकेत असफल जूगु खः । थुगुसी साउथगेटया लक्ष्य थ्व मैदानय् हे उपाधी त्याकेगु जुइ । थुगुसीया युरोकपया फाइनल व सेमिफाइनल कासा नं थ्व हे मैदानय् जुइत्यंगु दु ।