वालुवाटारय् अर्थ मन्त्रालय, अर्थमन्त्री जुइगु वरिष्ठ नेतातय् म्हगस ध्वस्त

येँ (नेपालभाषा टाइम्स) – प्रधानमन्त्री केपी शर्मा ओलीं पूर्व अर्थमन्त्री युवराज खतिवडायात मन्त्री पदं राजीनामा बीवं थः विशेष आर्थिक सल्लाहकार नियुक्त यानादीवं वय्कःया सतीपिं नेतात तकं झस्के जूगु दु। सूत्रतय्सं धाः कथं प्रम ओलीं खतिवडायात विशेष आर्थिक सल्लाहकार नियुक्त यायेगु बारे थःलिसे च्वनाः ज्या याइपिं मेपिं सल्लाहकारतय्के तकं सल्लाह कयामदी । वालुवाटारय् ओलीया मेपिं सल्लाहकारत खतिवडायात हःगु खँय् सन्तुष्ट मजूगु खँ नं सूत्रं धाःगु दु ।

खतिवडायात विशेष आर्थिक सल्लाहकार नियुक्त याःगुलिं आः अर्थ मन्त्री जुइगु लागिं पार्टीया वरिष्ठ नेतातय्सं यानाच्वंगु धेंधेंबल्लाः नं बन्द जूगु दु। छाय्धाःसां आः न्ह्याम्ह हे अर्थमन्त्री वःसां वं खतिवडाया छत्रछाँयाय् च्वनाः ज्या याये माली । खतिवडाया क्वय् च्वनाः ज्या यायेत बिष्णु पौडेल, वामदेव गौतम थेंज्याःपिं वरिष्ठ नेतात तयार जुइ मखु ।

प्रम ओलीं खतिवडायात मन्त्री सरहया सुविधा बियाः विशेष आर्थिक सल्लाहकार नियुक्त यानादीगुया अर्थ सिंहदरवारय् च्वंगु अर्थ मन्त्रालययात नं वालुवाटारय् सारे याये हःगु अर्थय् थुइकाच्वंगु दु। प्रम ओलीं थ्व स्वयां न्ह्यः राजश्व, कर आदि थेंज्याःगु छुं निकायतय्त न्हापा हे वालुवाटार सालेधुंकूगु दु। आः खतिवडायात नियुक्त यानाः मुक्कं मन्त्रालय हे वालुवाटार साला हःगु विश्लेषण यानाच्वंगु दु ।

खतिवडायात विशेष आर्थिक सल्लाहकार नियुक्त यायेधुंकाः आः मेम्ह अर्थमन्त्री नियुक्त यायेमाःगु आवश्यकता मंत । उकिं मन्त्रालय खाली याये मजिउ धकाः अन राज्यमन्त्री छम्ह तयेगु ग्वसाः जुयाच्वंगु दु । राज्यमन्त्री पदय् आः विमला राई पौडेल वा दामोदर भण्डारी मध्ये छम्हेसित यायेगु तयारी जुयाच्वंगु दु ।

खतिवडा धुंकाः सरकारया प्रवक्ता जुयादीम्ह प्रदिप ज्ञवालीयात आः परराष्ट्रं चीकाः सञ्चार मन्त्री दयेकीगु सम्भावना अप्वयाच्वंगु नं धाःगु दु ।