अन्तर्राष्ट्रिय सम्मेलनय् सफल विद्यार्थीयात सम्मान

थिमि – थनया नवरत्न इंग्लिश स्कुलं अन्तर्राष्ट्रियस्तरय् नेपाःया इतिहास कायम यायेत सफल विद्यार्थीतय्त छगू ज्याझ्वःया दथुइ सम्मान याःगु दु । बंगलादेशया ढाकाय् जूगु एस.क्यू.सी.सी.या २१ क्वःगु अन्तर्राष्ट्रिय सम्मेलनय् नेपाःया प्रतिनिधित्व यासें उत्कृष्ट पुरस्कार त्याकेत सफल विद्यार्थीतय्त स्कुलं कदर स्वरुप सम्मान याःगु खः ।

सम्मानित जुयादीपिं विद्यार्थीपिं जेनी मानन्धर, सुमन श्रेष्ठ, सर्सिज श्रेष्ठ, अन्सु श्रेष्ठ, लसता मानन्धर, जिज्ञासा श्रेष्ठ व स्वन्ति श्रेष्ठ खः । वंगु बैशाख २० निसें २२ स्वन्हुयंकं जूगु सम्मेलनय् भारत, पाकिस्तान, अमेरिका, दक्षिण अफ्रिका, बेलायत, श्रीलंका लगायत गुंगू देय्या नीगू स्वयां अप्वः स्कुलं ब्वति काःगु खः । उकीमध्ये सम्मेलनय् सहभागि नेपाःपाखें मध्यपुर थिमिया नवरत्न इंग्लिश स्कुलया विद्यार्थी ‘स्टुडेन्ट क्वालिटी कन्ट्रोल सर्कल–२०१८’य् फरक स्वंगू विधाय् उत्कृष्ट जुइत सफल जूगु खः ।

विद्यार्थीतय्त सम्मान यासें स्कुलया प्रिन्सिपल सुरेन्द्र श्रेष्ठं न्यागू फरक विधामध्ये कोलाज, क्वीज कन्टेष्ट व केस स्टडी एण्ड प्रेजेन्टेसनय् उत्कृष्ट जुयाः विद्यार्थीतय्सं स्कुलया जक मखसे नेपाःया गौरव वृद्धि यायेगु ज्या याःगु दु धयादिल । स्कुलया विद्यार्थीतय् नेतृत्व यासें बंगलादेश झायादीम्ह प्रिन्सिपल श्रेष्ठ विद्यार्थीत अन्तर्राष्ट्रियस्तरय् प्रतिस्पर्धा यायेत सक्षम जूगु धासें उत्साहित जुयादिल ।

उगु हे ज्याझ्वलय् टिन एम्बासडर–२०१८ सर्सिज श्रेष्ठ, नइ देरुनिख बाल पुरस्कार विजेता स्वन्ति श्रेष्ठ व नइ कोपिला पुरस्कार विजेता सगुन श्रेष्ठयात नं सम्मान याःगु खः। ज्याझ्वलय् नवासें प्रदेश नं. ३ या सांसद राजेन्द्रमान श्रेष्ठं नेपाःया प्रतिनिधित्व यासें अन्तर्राष्ट्रियस्तरय् नेपाःया शान वृद्धि याःगुलिं विद्यार्थीतय्त सुभाय् देछासें प्रोत्साहन बीमाःगु खँय् बः बियादिल ।
स्कुलया विद्यार्थीतय्सं थ्व स्वयां न्ह्यःनं आपालं राष्ट्रिय व अन्तर्राष्ट्रियस्तरया आपालं पुरस्कार त्याकेधुंकूगु दु ।

सम्बन्धित बुखँ

LEAVE YOUR COMMENTS