नेपाल घोडचढी संघयात अन्तर्राष्ट्रिय मान्यता

येँ – नेपाल घोडचढी संघयात अन्तर्राष्ट्रिय मान्यता बिउग दु । अन्तर्राष्ट्रिय इक्वेस्टेरियन महासंघया बेल्जियमया अन्टर्पमय् नोभेम्बर १४ निसें १७ तक च्वंगु विशेष साधारण सभां नेपाःयात अन्तर्राष्ट्रिय मान्यता बीगु निर्णय याःगु खः । महासंघया सचिव सर्बिना इबानेज थुकिया जानकारी बिउगु खः ।

नेपाल घोडचढी संघया अध्यक्ष रवी राजकर्णिकारं इक्वेस्टेरियन महासंघया निर्णययात लसकुस याःगु दु । अध्यक्ष राजकर्णिकारं वंगु खुदँ न्ह्वःनिसें यानावयाच्वनागु कुतः सफल जूगु धासें दक्वसित सुभाय् देछाःगु दु ।

नेपाःयात अन्तर्राष्ट्रिय मान्यता बीगु निंतिं वंगु महिनाय् संघया पदाधिकारीतं नेपालय् वःगु खः । पदाधिकारीतय्सं नेपालय् घोडचढीया सम्भावना व विकासयात कयाः जानकारी काःगु खः । पदाधिकारीतय्गु पुचलं रक्षामन्त्री डा मिनेन्द्र रिजाल, युवा तथा खेलकुद मन्त्री महेश्वर गहतराज, नेपाल ओलम्पिक कमिटीया पदाधिकारीत, राखेपया पदाधिकारीत व नेपाल आर्मी क्याभिलरी विभागया पदाधिकारीतय्त नापलाःगु खः ।