बौद्ध विद्वान पं. वज्राचार्यया सफू पिदन
येँ(नेपालभाषा टाइम्स)÷ बौद्ध विद्वान पं. दिव्यवज्र वज्राचार्यं च्वयादीगु च्वसुया संग्रह सफू ‘सम्यक सम्बोधि’ पिदंगु दु । वंगु शनिवाः ज्याथा छुस्याबहाःस्थित गुणाकर महाविहारय् जूगु छगू ज्याझ्वःया दथुइ बौद्ध विद्वान पं. वज्राचार्यया उगु सफूया पितब्वज्या याःगु खः ।
बौद्ध विद्वान प्रा. डा. वज्रराज शाक्यं मूपाहांकथं झायादीगु ज्याझ्वलय् वय्कःलिसें लुम्बिनी बौद्ध विश्वविद्यालयया निवर्तमान उपकुलपति प्रा. डा. हृदयरत्न वज्राचार्य, नेपाल परम्परागत बौद्ध धर्म संघया केन्द्रीय नायः बौद्ध विद्वान प्रा. डा. नरेशमान वज्राचार्य, लोटस रिसर्च सेन्टरया नायः सुरेन्द्रमान वज्राचार्यं मंकाःकथं उगु सफू पितब्वज्या यानादीगु खः ।
पितब्वज्या जूगु सफू व च्वमि पं. वज्राचार्यया थीथी पक्षयात कयाः पाहांपिंसं नुगःखँ तयादीगु खः । पं. वज्राचार्यया काय पियुष वज्राचार्यं थः अबुया १०४ दँ बुदिंया झ्वलय् वय्कःया लुमन्तिइ सफू पिथनागु जानकारी बियादीगु खः ।
महायान बौद्ध समाजया ग्वसालय् जूगु ज्याझ्वः सफुतिइ दुथ्याःगु च्वसुया संकलन व सम्पादन यानादीम्ह बौद्ध विदुषि वज्राचार्यया सभापतित्वय् जूगु खः । पं. वज्रचार्यं च्वयादीगु ११ पु च्वसु दुथ्याकाः पिथंगु सफूया निंतिं कमललक्ष्मी तुलाधर साहु पद्मधर तुलाधर व केशनवती तुलाधरं थः मांअबुया लुमन्तिइ प्रायोजन यानादीगु खः ।
LEAVE YOUR COMMENTS