निम्ह बाहेक फुक्क हे जेल चलान
येँ (नेपालभाषा टाइम्स)- नक्कली भुटानी शरणार्थी प्रकरणय् दुथ्याःपिं झिंखुम्हेसित मुद्दा क्वमचाःतले पुर्पक्षया नितिं कारागारय् छ्वयेगु फैसला जूगु दु । म्हिगः येँया जिल्ला अदालतं थ्व आदेश बिउगु खः । अभियुक्त मध्ये निम्हेसित धाःसा धरौटीइ त्वःतेत व ल्यं दुपिंत कारागार छ्वयेत आदेश बिउगु खः । अदालतं लक्ष्मी महर्जनयात ५ लाख व टंक गुरुङयात १० लाख तका धरौटीइ त्वःतेत आदेश बिउगु खः । थ्व मुद्दा प्रकरणय् झिंनिम्ह मनूत धाःसा अझं बिसिउँ वनाच्वंगु दनि ।
जिल्ला अदालतया न्यायाधीश प्रेमप्रसाद न्यौपानेया इजलासं म्हिगः पुलांम्ह उपप्रधानमन्त्री टोपबहादुर रायमाझी, पुलांम्ह गृहमन्त्री बालकृष्ण खाँण व बहालवाला सचिव (थौंकन्हय् निलम्बित) टेकनारायण पाण्डे सहित झिंखुम्हेसित कारागारय् तयाः मुद्दा न्ह्याकेगु धकाः आदेश बिउगु खः । थुगु आदेश लिपा झिंखुम्ह अभियुक्तत आः न्यायिक हिरासतं कारागार चलान जुइ ।
भुटानी शरणार्थी प्रकरणय् ज्वंपिं झिंखुम्ह व बिसिउँ वनाच्वंपिं १४ म्ह विरुद्ध जिल्ला सरकारी वकिलया कार्यालयं येँनं ठगी, संगठित अपराध, किर्ते व राज्य विरुद्धया अपराध कसुरय् कैद, बिगो व जरिवाना माग यानाः वंगु जेठ १० गते मुद्दा दायर याःगु खः ।
वंगु चैत १२ गते गिरोहया नाइके केशव दुलाल, सानु भण्डारी व टंक गुरुङयात प्रहरीं ज्वनेधुंकाः अदालतय् म्याद थप यानाः अनुसन्धान न्ह्याकेगु झ्वलय् पुलांम्ह उपप्रधानमन्त्री रायमाझी, पुलांम्ह गृहमन्त्री खाँण, गृह सचिव पाण्डे, तत्कालीन गृहमन्त्री रामबहादुर थापाया सुरक्षा सल्लाहकार इन्द्रजित राई, भुटानी शरणार्थी नेता टेकनाथ रिजाल सहित झिंच्याम्हेसित ज्वंगु खः ।
प्रहरी नक्कली भुटानी प्रकरणय् दुथ्याःपिं कांग्रेसया पुलांम्ह सभासद आङटावा शेर्पा, नेपाल हज समितिया अध्यक्ष शम्शेर मियाँ, टोपबहादुर रायमाझीया काय् सन्दिप रायमाझी, गिरोहया दुजःपिं सागर राई, रामशरण केशी, गृहमन्त्री खाँणया स्वकीय सचिव नरेन्द्र केसी व गोविन्द चौधरी, हरिभक्त महर्जन व लक्ष्मी महर्जनयात ज्वंगु खः ।
मुद्दा दायर जूगु निन्हु लिपा जेठ १२ गतेनिसें अदालतं अभियुक्ततय्के थुनछके बहस न्ह्यः बयान काःगु खः । बयान कायेगु ज्या वंगु जेठ १९ गते क्वचाःगु खःसा वयां निन्हु लिपा थुनछेक बहसया नितिं इजलास च्वंगु खः । स्वन्हु तक सरकारी वकिलं मुद्दाया पक्षय् बहस याःगु खः ।
वयां लिपा प्रतिवादीपाखें आपालं कानुन व्यवसायीतय्सं गुन्हु तक बहस याःगु खःसा म्हिगः सरकारी वकिलतय्सं जवाफी बहस लिपा थुनछेक आदेश जारी जूगु खः ।
नकली शरणार्थीया थ्व प्रकरणयात नेपाःया न्याय, प्रशासन व राजनीतिया हे परीक्षण जुइगु तःधंगु मुद्दाया रुपय् कायेगु याना हःगु दु ।
LEAVE YOUR COMMENTS