यूट्युबरतय्त काउन्सिलया कारवाही

येँ (नेपालभाषा टाइम्स)- लाक्वपाक्व समाचार दयेकाः थः यत्थे प्रशारण याइपिं युट्युबरतय्त प्रेस काउन्सिलं कारवाही शुरु याना हःगु दु । आः नकतिनि हे वंगु १५ न्हुया दुने अज्याःगु ३१ गू युट्यूब च्यानलया सञ्चालक (व्यक्ति व कम्पनी) यात कारवाही याःगु खँ सीदुगु दु ।

काउन्सिलं थःथाय् दर्ता जुयाच्वंगु व मजूनिगु निगुलिं कथंया यूट्युबरतय्त कारवाही याःगु खः । उमिसं लाथेपाथे सामग्री दयेकाः समाजय् द्वन्द्व बढे यायेगु, चरित्रहत्या यायेगु व छगू पक्षीय ढंगं समाचार सम्प्रेषण याना वयाच्वंगु यूट्युबरतय्त कारवाहीया दायरा दुने हःगु खः । काउन्सिलं हेल्लो टिभी नेपाल फेसबुक पेज, पीएनपी मिडिया व नागरिकपत्र यूट्युबयात उकी समावेश यानातःगु अश्लील सामग्री २४ या दुने चीकाः सम्पादन सहितया सामग्रीत जक प्रकाशन या धकाः निर्देशन बिउगु खः ।

अथे हे मिडियाया रुपय् दर्ता मयासे चले यानाच्वंगु व थज्याःगु हे अश्लील सामग्री प्रकाशन याःगु २८ गू युट्युबरतय्त कारवाहीया लागिं साइबर ब्युरोलिसे पत्राचार यानागु जानकारी नं काउन्सिलं बिउगु दु ।