क्यानडाय् येँयाः पुन्हि हन
येँ (नेपालभाषा टाइम्स)- क्यानडाया एडमन्टन शहरय् च्वंपिं नेपाःमिपिंसं वंगु सेप्टेम्बर २१ शनिवाः कुन्हु नेपाल संवत् ११४४ या गुंपुन्हि (क्वाति पुन्हि) व येँयाः पुन्हि (इन्द्रजात्रा) विशेष सांस्कृतिक ज्याझ्वः यासें तःजिक हन । सांस्कृतिक ज्याझ्वः नेवाः कल्चरल सोसाइटी अफ अलव्रताया ग्वसालय् एडमन्टन शहरया भिक्टोरिया पार्कय् जूगु खः ।
सांस्कृतिक ज्याझ्वलय् नेवाः कल्चरल सोसाइटीया संस्थापक नायः डा. हेमन्त जोशीं सकसितं लसकुस यासें सोसाइटीं याना वयाच्वंगु नेवाः भाय्, साहित्य, कला, तजिलजिया बारे कनादिल । वय्कलं वनेधुंकूगु गुंपुन्हि अले न्ह्यानाच्वंगु येँयाः पुनिह नखःयागु थःथःगु महत्व झीगु समाजय् दुगु खँ धयादिल । नखः हनेगु झ्वलय् गणेद्यः, भैलःद्यः, कुमारी िलसें इन्द्रया पुजा नेवाः चलन कथं संस्थाया न्वकु मय्जु देविना प्रधान धौभडेलं यानादिल । अथेहे ज्याझ्वलय् झायादीपिं सकसिनं द्यः पुजा यानादीगु खः ।
सांस्कृतिक ज्याझ्वलय् झायादीपिं सकसितं गुंपुन्हिबलय् नइगु नसाज्वलं क्वाति व छुचुंमरि कौला याकूगु खः । अथे हे तुच्चा कथं येँयाःबलय् नइगु समय्बजि नकूगु खः । समयबजि नापं खाय त्वनेगु व्यवस्था नं याःगु खः । सांस्कृतिक ज्याझ्वलय् पुलुकिसि, लाखे प्याखं न्ह्यब्वःगु खः । येँयाः पुन्हि सम्बन्धी म्येया लिसें थीथी नेवाः म्ये हायेकाः न्ह्यइपुगु नेवाः लकस दथुइ ज्याझ्वः जूगु खः ।
थ्वहे ज्याझ्वः दथुइ संस्थाया दँमुँज्या नं जूगु खः । ज्याझ्वलय् संस्थाया छ्याञ्जे विरेन्द्र कायस्थं दछिया दुने संस्थापाखें जूगु ज्याया विवरण न्ह्यब्वःगु खःसा दांभरिं बिरेन्द्र पियां दछिया दुने जूगू कालबिलया ल्याःचाः न्ह्यब्वयादीगु खः । वय्कःपिंसं न्ह्यब्वयादीगु प्रतिवेदन दँमुँज्या अनुमोदन याःगु खः । ज्याझ्वलय् संस्थाया न्वकु त्रिप्रसाद धौभडेलं गुंपुन्हि व येँया पुन्हि नखः बारे थःगु खँ तयादिसें ज्याझ्वःयात ग्वाहालि यानादीपिं सकसित सुभाय् देछायादीगु खः ।
LEAVE YOUR COMMENTS