स्वनिगलय् न्हिं २० टन फोहोर च्याकी

येँ स्वनिगःया न्यागू नगरपालिकाय् थौंकन्हय् अःपुक फोहोर व्यवस्थापन यायेगु नामय् छेँय् छेँय् उत्पादन जुइगु फोहोर च्याकेगु गुगु ज्या जुयाच्वंगु खः, थ्व मनूया स्वास्थ्य व पर्यावरणया लागिं पेट्रोल च्याकेगु ज्या स्वयां नं ग्यानापुगु खँ अनुसन्धानतय्सं धाःगु दु ।

स्वनिगः दुने लाःगु येँ, यल, ख्वप, किपू व थिमि नगरपालिकाय् जुयाच्वंगु फोहोर च्याकेगु ज्याया बारे जूगु अनुसन्धानया छगू रिपोर्टय् थ्व खँ धयातःगु खः । फोहोर च्याकेगु ज्यायात कयाः जूगु उगु अनुसन्धानया रिपोर्ट नकतिनि सार्वजनिक जूगु खः ।

रिपोर्टय् उल्लेख जुयाच्वं कथं थौंकन्हय् स्वनिगः दुने लाःगु थ्व न्यागू नगरपालिकाय् न्हिं ५०० टन फोहोर उत्पादन जुयाच्वंगु दुसा उकी मध्ये २० टन फोहोर च्याकेगु ज्या जुयाच्वंगु दु । थ्व ल्याखं थ्व लागाय् दँय् ७४०० टन फोहोर च्याकेगु ज्या जुयाच्वंगु दु ।

फोहोर च्याकेबलय् पिहां वइगु कुँपाखें मनूयात स्वँ, नुगःचु व एलर्जीया ल्वय् जुइ फइगु खँ उगु अनुसन्धान पुचःया छम्ह दुजः भूपेन्द्र दासं कनादीगु दु । वय्कलं कनादी कथं पर्यावरणया दृष्टिकोणं धायेगु खःसा पेट्रोल च्याकाः पिहां वइगु कुँ स्वयां नं फोहोर च्याकाः पिहां वइगु कुँ तसकं हानीकारक जू । थुकिं मनूया स्वास्थ्य व पर्यावरणयात यक्व प्रभावित याइगु खँ कँसें दासं थुकियात इलय् हे समाधान याये मफुत धाःसा भारतया न्हूदिल्लीइ थें ग्यानापुगु पर्यावरण समस्या वये फइगु खँ नं वय्कलं कनादिल ।

नगरपालिकातय्सं इलय फोहोर मुना मयंकीगु कारणं यानाः सर्वसाधारण जनतां अथे फोहोर च्याकीगु खँ धाःगु दु ।