गृहया ख्याच्वः विरुद्ध रिट दायर

येँ – मिलेनियम च्यालेन्ज कर्पोरेशन (एमसीसी) बारे नकारात्मक टिप्पणी याये दइ मखु धासें गृह मन्त्रालयं जारी याःगु वक्तव्य विरुद्ध सर्वोच्च अदालतय् रिट दायर जूगु दु । अधिवक्ता प्रवेश केसीं दायर याःगु रिटय् गृहया वक्तव्य संविधानं बिउगु विचार व अभिव्यक्ति स्वतन्त्रताया अधिकार अःखः खः धयातःगु दु ।

विकास आयोजनायात कयाः गुण व दोषया आधारय् सचेततापूर्वक विचार निर्माण यायेगु नागरिकया नैसर्गिक अधिकार खः धासें रिटय् धयातःगु दु, ‘गुगुं नं विदेशी आयोजनाया नकारात्मक टिप्पणी याये दइ मखु धकाः राज्यं घोषणा यायेगु लिसें यदि यात धाःसा कडा कारबाही यायेगु धकाः ख्याच्वः बीगु धइगु परोक्ष रुपय् नागरिकत उगु आयोजनाया सकारात्मक टिप्पणी यायेमाः व सुम्क च्वनेमाः धाःगु खः ।’

रिटय् गृह मन्त्रालयया सुचं बदर यानाः उगु निर्णयया आधारय् जुइ फइगु कडा कारबाही मयायेत÷मयाकेत परमादेश बीत नं माग यानातःगु दु । रिटया पेशी २७ भदौया निंतिं क्वःछिनातःगु दु ।