फुटुङया अभिलेखय् दुर्लभ मिति

येँ(नेपालभाषा टाइम्स)-फुटुङया छखा छेँय् छुं ई न्ह्यः लुया वःगु धाःगु लिच्छवीकालीन ल्वहंपती बिस्कंकथंया निगू मिति लुया वःगु खँ सीदुगु दु । फुटुङया छखा छेँय् लःया ट्यांकी दयेकेत गाः म्हूगु इलय् अन लिच्छवीकालीन ल्वहंपौ लुया वःगु खः ।

थःगु छेँय् ल्वहंपौ लुया वयेवं छेँथुवालं उकियात नष्ट याके बिउगु खः । अथे खःसां ल्वहंपौ नष्ट याये न्ह्यः कयातःगु किपाया लिधंसाय् उकी निगू फरक फरककथंया मिति व अधिमासया खँ न्ह्यथनातःगु तथ्य पत्ता लगे याःगु दु ।

उगु ल्वहंपती इतिहासय् न्हापांखुसी निगू बिस्कं बिस्कंया मिति व अधिमासया बारे न्ह्यथनातःगु खँ सीदुगु दु । ल्वहंपती प्रौढ संस्कृति भासं लिच्छवी संवत् व लिच्छवी लिपिया प्रयोग यानातःगु खः ।

छेँ थुवालं ल्वहंपौ लुया वःगु सिल धाःसा सरकारं थःगु छेँ हे सरकारीकरण याना बी धइगु ग्याःचिकुं ल्वहंपौ कुचा कुचा याना बिउगु खः । उगु ल्वहंपौया उकथं क्षति यायेवं नेपाःया प्राचीन इतिहास सीकेगुलिइ क्षति जूगु खः सरोकारवालातय्सं धाःगु दु ।

लिपिविज्ञ श्याम सुन्दर राजवंशीं महिदेव व वसन्तदेवया पालय् थ्व अभिलेख प्रशासनिक राजआदेशपाखें फुटुङय् च्वंपिंत बिउगु खनेदु धाःगु दु ।