तंया झाे‌ंकय् सिंहयात ख्याम्ह

धाइ तंयात नियन्त्रणय् तयेमाः । तं पिहां वइगु इलय् मनुखं थःगु होस तंकी । जब तं क्वलाइ, होसय् वइ, अबलय् तकया दुने धाःसा गाक्कं क्षति जुइ अले पश्ताय् नं चायेमाली ।

तर छम्ह मनुखं सिंहतलिसे तं पिहां वःगु झोंकय् इमिगु हे दथुइ वनाः थम्हं न्ह्यानातःगु लाकां त्वःता दाया बिउगु दु । काचाक न्यनेबलय् गुगुं बाखं थें च्वने फु । तर थ्व बाखं मखु, सत्य घटना खः । थ्व घटना खः युक्रेनया ।

अनया चिडियाखानाया सिंहत थवंथवय् ल्वानाच्वंगु खनाः तम्वःम्ह मेनेजर ओलेग जबकोव न्हय्म्ह च्याम्ह सिंह दुगु थासय् वनी । जब जबकोव सिंहया पुचलय् थ्यनी अन मुनाच्वंपिं सिहंत नं बिसिउँ वनी । गुलिं सिंहत धाःसा ल्वाना हे च्वंगु दइ । थ्व खनाः जबकोव थम्हं न्ह्यानातःगु चप्पल हे त्वःताः इमित दायेत सनी । सिंहत धाःसा भागाभाग जुइक बिसिउँ वनी ।

थुकिया छगू भिडियो आः नकतिनि सार्वजनिक जूगु दु । उगु भिडियोय् जबकोव सिंहया बथां दुगु थासय् वनाः इमित चप्पलं दाइ । उगु भिडियोय् जबकोव सिंहत खनाः तसकं चिल्लाय् दनाः हाली । चप्पलं दाये धुंकाः जबकोवं धाइकि ‘अनुशासनय् च्वनेगु खःसा च्वँ, मखुसा थ्व स्वयां नं बांमलाःगु पाठ स्यनेमाली ।’ थुलि धायेवं चिडियाखानाया सिंहत दक्वं थःथःगु थासय् सू वनी ।