खुसि सिथया मापदण्डय् लाःगु छेँबुँ न्याइपिं सक्रिय
येँ / स्वनिगः दुनेया थीथी खुसि सिथय् थप २० मिटर थाय् त्वःतेमाः धकाः सर्वोच्च अदालतं याःगु आदेशया कारणं मर्काय् लाःपिं छेँ/बुँ थुवाःतय् छेँ वा जग्गा न्यायेगु लागिं छथ्वः मारवाडीत सक्रिय जुयाच्वंगु खँ सीदुगु दु ।
मापदण्ड दुने लाःगु जग्गा धितो तयाः ध्यबा त्यासा कयातःपिं ऋणीतय्त वंगु छुं ई न्ह्यवंनिसें बैंकतय्सं फोन यानाः कि मखुसा याकनं ध्यबा पू वा, कि मखुसा थ्व धितोया पलेसा मेगु धितो तः वा धकाः दबाब बिया हयाच्वंगु खः ।
बैंकतय्सं दबाब बिया हःगुलिं त्यासा कयातःपिं ऋणीत तसकं मर्काय् लानाच्वंगु दु । छाय्धाःसां बैंकय् त्यासा कयातःगु ध्यबा गुलिस्यां मस्त विदेश छ्वयेत खर्च यायेधुंकलसा गुलिं व्यवसायय् लगानी यानातःगु दु । बैंकतय्सं धायेसातकि थ्व ध्यबा लित बी फइगु अवस्था मदु ।
बैंकया दबाबं मर्काय् लानाच्वंपिं अज्याःपिं छेँ वा जग्गा थुवाःतय्त जग्गा मीगु खःसा न्याइपिं दु धकाः जग्गा दलालत सक्रिय जुयाच्वंगु खँ सीदुगु दु । बैंकय् धितो लानाच्वंगु अज्याःगु छेँ वा जग्गा न्यायेगु लागिं मारवाडीतय् छगू तःधंगु पुचः सक्रिय जुयाच्वंगु व उमिसं हे दलालत लगे यानाः मर्काय् लाःपिंत स्वापू तयेकेगु ज्या यानाच्वंगु खँ नं सूत्रं धाःगु दु ।
थौंकन्हय् थप २० मिटर मापदण्ड विरुद्ध सर्वोच्चय् मुद्दा जुयाच्वंसां उकी लानाच्वंगु न्याये–मी सम्बन्धी प्रतिबन्ध धाःसा फुकुवा यायेधुंकूगु दु । उकिं सुना नं चाहे जुल धाःसा अन जग्गा न्याये–मी याये फइ । सरकारं न्याये–मी फुकुवा याःगुलिं मर्काय् लानाच्वंपिनि जग्गा न्यायेगु लागिं मारवाडीत सक्रिय जुयाच्वंगु खँ धाःगु दु ।
लुमंकेबहः जू, थौंकन्हय् नेपाःया आपालं तःधंगु बैंकत नं विशेष यानाः मारवाडी समुदायया हे ल्हातय् लानाच्वंगु दु । उमिसं समुदायगत रुपं हे छखे बैंकं दबाब बियाः मेखे जग्गा न्यायेगु अभियान न्ह्याकूगु आशंका याना हःगु दु ।
LEAVE YOUR COMMENTS