ने. सं. ११४३ तछलाथ्व दशमी -

मोहनि बिदा सिधःसां ज्याकू सुनसान

येँ -मोहनि नखःया झ्वलय् बीगु याना वयाच्वंगु सार्वजनिक बिदा थुगुसीनिसें क्वपाःसां सरकारी ज्याकुथी धाःसा कर्मचारी मवयाः विदा थेंज्याःगु हे माहौल ब्वलंगु दु । सरकारी ज्याकू म्हीगंनिसें खुले जुइधुंकूसां अन ज्या याइपिं कर्मचारीत धाःसा ३० प्रतिशत हे मथ्यंगु खँ धाःगु दु ।

राजधानी येँ देय्या थीथी मन्त्रालय, विभाग व कार्यालयय् ज्या याइपिं सकलें कर्मचारीत मथ्यंगु जुयाः म्हिगः तक नं ज्याकू सुनसान हे खने दयाच्वंगु खः ।

राजधानी येँय् जक मखु प्रदेश नं. ३ व ४ या सरकारी ज्याकू तकं म्हिगः सुनसान खने दुगु खँ धाःगु दु ।
ज्याकुथी ज्या याः वइपिं कर्मचारी जक मखु ज्या याके माःपिं सेवाग्राहीत तकं म्हिगः व म्हीग खास मवःगु खँ अन सीमित रुपय् वयाच्वंपिं कर्मचारीतय्सं धाःगु दु ।

लिसें बिदा सिधःसां मोहनि न्यायेकेत लिहां वनाच्वंपिं आपालं मनूत अझं लिहां मवःनिगु कारणं स्वनिगःया सतकय् तकं म्हिगः उलि भिड खने मदुनि । राजधानीं पिहां वनाच्वंपिं यक्व दुहां मवःनिगु जुयाः कर्मचारी व सेवाग्राहीत सरकारी ज्याकुथी मथ्यंगु खः ।
बिदा क्वपाःसां सरकारी ज्याकुथी ज्या धाःसा जुइ मफुगु कारणं मोहनिया बिदा क्वपाःगु बारे पुनर्विचार याये मालीगु बिचाः नं न्ह्यःने तया हःगु दु ।

थनिंनिसें मोहनि क्वचाल
थौं कतिं पुन्हि मोहनिया अन्तिम न्हि खः । थनिंनिसें मोहनि पर्व क्वचाःगु जुइ । छेँय् छेँय् पिनातःगु नःलास्वां थौं छेँया लुखाखलुइ हयाः विसर्जन याइ । नःलास्वां विसर्जन यायेवं थ्व ज्यां छेँय् मोहनि नखः क्वचाःगु सन्देश बी । थनं लिपा मोहनिया सिन्हः तीगु ज्या नं बन्द जुइ । थौंया न्हियात कोजाग्रत पुर्णिमा नं धायेगु याः । म्हिगः येँया नःघःस्थित सीघलय् विशेष पुजा याइगु जूगुलिं थ्व न्हियात सीपुन्हि नं धायेगु याः ।