ला कुचा कुचा यानाः गिद्धयात नकेगु मृत्युसंस्कार

येँ – नेपाःया मुस्ताङ जिल्लाय् मनू सित कि सीम्हयात कुचा कुचा यानाः गिद्धयात नकेगु चलन क्वय्या मुस्ताङय् धमाधम तना वनेधुंकूसां च्वय्या मुस्ताङय् धाःसा अझं कायम हे दनि । च्वय्या मुस्ताङय् च्वंगु लोमाङथान गाविसय् मनू सित कि सीम्हयात कुचा कुचा यानाः गिद्धयात नकुसें अन्तिम संस्कार यायेगु चलन आः तकं जारी हे जुयाच्वंगु दु ।

उच्च हिमाली लागाय् प्रचलित थ्व मृत्युसंस्कारयात छगू अजूचायापुगु चलन कथं कायेगु याः । उच्च हिमाली लागाय् च्याकेत सिँ मदइगु, थुना तःसा याकनं ध्वमगीगु कारणं यानाः सीम्हयात कुचा कुचा यानाः गिद्धयात नकीगु खः । गिद्ध धइम्ह सर्गतय् तसकं च्वय् च्वय् थ्यंक ब्वइगु जूगुलिं थ्व पंक्षीयात ला नकल धाःसा सीम्ह नं याकनं स्वर्गय् थ्यनी धइगु जन विश्वास दु ।

थ्व लागाय् मनू सित कि वयागु सीम्हयात निन्हु तक थुना तइगु व स्वन्हु कुन्हु लामा गुरुं चुपिं ध्यनाः ला कुचा कुचा यानाः गिद्धयात नकीगु खः । क्वँय्यात मुगलं छ्यानाः चुंचुं यासें व नं गिद्धयात हे नका छ्वइगु खः । सीम्हेसिया ला थथे गिद्धयात नकेगु ज्या वर्यावरणीय ल्याखं नं बांलाः जूगु खँ धायेगु याः । थुकिं यानाः दुर्लभ जातिया गिद्धया नं संरक्षण जुइगु खँ पर्यावरणवादीतय्सं धायेगु याः ।

च्वय्या मुस्ताङय् विशेष यानाः बिष्ट, थकाली व गुरुङ जातिं थुकथं अन्तिम संस्कार याइगु चलन दु । क्वय्या मुस्ताङय् धाःसा ला कुचा कुचा याइपिं लामा गुरुपिं हे मदयेधुंकूगु कारणं थज्याःगु चलन मदया वनेधुंकूगु खँ धाःगु दु । थौंकन्हय् च्याकेगु, थुनेगु वा कुचा कुचा यानाः खुसिइ चुइका छ्वयेगु यानाच्वंगु खँ स्थानीयतय्सं धाःगु दु ।