येँया सोह्रखुट्टेय् छम्हेसित कोरोना, थौं थप १९म्ह संक्रमण

येँ – येँया सोह्रखुट्टेय् थौं छम्हेसित कोरोना भाइरसया संक्रमण जूगु दु । येँ महानगरपालिका अन्तर्गत १६वडाया ६९दँया मिजंयात संक्रमण जूगु पुष्टि स्वास्थ्य तथा जनसंख्या मन्त्रालयं याःगु दु ।

येँया नापं थौं पर्सा, रुपन्देही, भैरहवा व कपिलवस्तुइ ३म्ह-३म्ह व मोरङ, बारा, रौतहट, सर्लाही, नुवाकोट व गुल्मिइ छम्ह-छम्हेसित संक्रमण जूगु पुष्टि स्वास्थ्य तथा जनसंख्या मन्त्रालयं याःगु दु ।

आइतवाः मोरङ बारदशी-२या ४५दँया मिजं, बाराया कलैयाया ३२दँया मिजं, पर्सा वीरगञ्जया २५दँया मिजं, पर्सा स्थायी ठेगाना जूसां बाराय् ज्या यानाच्वम्ह ३४दँया मिजं, पर्साया हे ६०दँया मिजंयात संक्रमण जूगु दु ।

अथेहे रौतहट छेँ जुयाः कलैयाय् च्वनाच्वम्ह ३२दँया मिजं, सर्लाहीया ४८दँया मिजं, रुपन्देहीया ३२, ४० व ५०दँया मिजंत व नुवाकोटया ककनीया ३९दँया मिजंयात कोरोनाया पुष्टि जूगु खँ स्वास्थ्य मन्त्रालयया प्रवक्ता डा. विकास देवकेटां धयादिल ।

प्रादेशिक जनस्वास्थ्य प्रयोगशाला भैरहवाय् याःगु परीक्षणय् रुपन्देहीया २३, ३३ व ४०दँया मिजंत, कपिलवस्तुया ३५, ३७ व ५२दँया मिजंत व गुल्मीया ३१दँया मिजंयात नं कोरोना भाइरसया पुष्टि जूगु दु ।

नुवाकोटय् संक्रमण खनेदुगु थ्व न्हापांगु घटना खः । थ्व नापं कोरोनाया संक्रमण ४२गू जिल्लाय् थ्यंगु दु । नेपालय् कोरोना संक्रमतितय् ल्याः ६०३म्ह थ्यंगु दु ।