कोरोनां सीपिं द्वःछिम्ह थ्यन

येँ (नेपालभाषा टाइम्स) – नेपालय् कोरोना भाइरसं सीपिनि ल्याः द्वःछिम्हं मल्याक थ्यंगु दु । म्हिगः मंगलवाः न्हिछिया दुने नीम्ह मनूत कोरोना भाइरस संक्रमणया कारणं सीगु खः । थुकिया लिसें नेपालय् कोरोनां सीपिनि ल्याः १००४ म्ह थ्यंगु दु । मंगलवाः जक नेपालय् थप ३११४ म्हेसिके संक्रमण खनेदुगु दु । थुकिया लिसें नेपालय् कोरोना संक्रमण जूपिनि ल्याः नं १ लाख ७९ हजार ६१४ म्ह थ्यंगु दु । थुकी मध्ये १ लाख ४१ हजार १३४ म्ह संक्रमण मुक्त जुइधुंकूगु दु । म्हिगः २४ घन्टाया दुने मुक्कं ११ हजार १६६ म्हेसिया जक स्वाब परीक्षण जूगु खः । सरकारं स्वाब परीक्षणया निंतिं नं ध्यबा कायेगु निर्णय यायेधुंकाः स्वाब परीक्षण नं म्हो जुया वनाच्वंगु दु ।