बागमतिया भाषा विधेयकय् सहलह
येँ (नेपालभाषा टाइम्स)÷बागमति प्रदेशय् नेपालभाषा व तामाङ भाषायात नं सरकारी ज्याखँया भाषा दयेकेगु लागिं तयार यानातःगु कानूनया मस्यौदायात कयाः म्हिगः प्रदेश सरकारं सम्बन्धित जातिया थीथी खलः पुचः व विज्ञतलिसे राय सुझाव कायेगु ज्या यात ।
जावलाख्यःया प्रदेश सुशासन केन्द्रय् जूगु उगु ज्याझ्वलय् नेवाः देय् दबू, तामाङ घेदुङ लिसें बागमति प्रदेश दुने लाःगु थीथी जातीय पुचःया प्रतिनिधि–तय्सं ब्वति काःगु खः ।
सहभागी प्रतिनिधितय्सं भाषा विधेयकया मस्यौदायात कयाः पुचः सहलह यासें आवश्यक सुझाव बिउगु खः । प्रदेश सरकारपाखें थ्व सुझाव समेत कयाः विधेयकयात सुधार यानाः फयांफछि याकनं हे प्रदेश सभाय् पेश यायेगु खँ धाःगु दु ।
गुंगू परिच्छेद व २९ गू दफा दुगु उगु विधेयकयात सरकारं ‘बागमती प्रदेशया राष्ट्रभाषा ऐन, २०७९’ धकाः नां तःगु दु । थुकी बागमती प्रदेशय् खस नेपाली धुंकाः दकलय् अप्वः ल्हाइगु निगू भाय् तामाङ व नेवाःयात सरकारी ज्याखँया भाय् दयेकेगु व थ्व प्रदेश दुने च्वंगु मेगु १७ गू भाषायात स्थानीयतहस्तरं मान्यता बिया यंकेगु खँ दुथ्याकातःगु दु ।
थ्व ऐन लागू जुइधुंकल कि फुक्कं सरकारी, सार्वजनिक निकाय, शिक्षा, न्यायालय थेंज्याःगु थासय् नेवाः व तामाङ भाय् छ्यलेगु व्यवस्था जुइ । नापं थुकी भाषा छ्यःगु आधारय् सुुना नं अपमान यायेगु, ज्या याना मबीगु ज्या यात धाःसा उमित कानुनी दण्ड बीगु खँ नं दुथ्याकातःगु दु । अथे हे थ्व ज्या धिसिलाकेत प्रदेश दुने भाषा आयोग, भाषा विकास प्रतिष्ठान थेंज्याःगु निकायत स्थापना यायेगु खँ नं दुथ्याः ।
म्हिगः जूगु सहलह ज्याझ्वलय् न्ववासें बागमती प्रदेशया मुख्यमन्त्री शालिकराम जम्मरकट्टेलं पहिचानया आन्दोलनयात सम्बोधन यायेकथं थ्व ज्या न्ह्याकेत्यनागु खः धयादिल । अथे हे बागमति प्रदेशया संस्कृति मन्त्री लिसें थ्व सम्बन्धी ज्या यायेत नीस्वनातःगु कार्यदलया संयोजक कुमारी मोक्तानं आः थ्व विधेयक याकनं पारित यानाः कार्यान्वयन याना यंकेगु थःपिनि ग्वसाः दुगु खँ कनादिल । ज्याझ्वलय् भाषा आयोगया अध्यक्ष डा. गोपाल ठाकुरं नं न्ववानादीगु खः ।
LEAVE YOUR COMMENTS