ने. सं. ११४४ कछलागा षष्ठी -

देगःया जग्गा व सतलय् स्कुलया मिखा

येँ – येँ मनपा १३ वडास्थित तख्ति अजिमाया सतः थुनाः स्कुलया छेँ दनेत्यंगु खँय् स्थानीय जनतां विरोध याःगु दु । टंकेश्वरय् च्वंगु निलवाराही माविं बाराही गुथिया सतः थुनाः अन स्कुल भवन दयेकेगु योजना हःगु खः । सडक विस्तार पीडित संघर्ष समितिया संयोजक सुमन साय्मि अन नेवाःतय् सम्पदा अतिक्रमण यायेत स्वयांच्वंगु धासें उगु थाय् ल्यंकेगु निंतिं थःपिंसं वइगु शनिवाः सुथय् स्थानीय वासिन्दाया भेला तयागु खँ कनादिल ।

लिसें स्कुलं थःपिनिगु निर्माण योजना मदिकल धाःसा आन्दोलनया लिसें स्थानीय वासिन्दां मुद्दा तयेगु तयारी यानाच्वंगु जानकारी नं वय्कलं बियादिल । स्कुलया प्रधानाध्यापकलिसे सहलह यानाबलय् वय्कलं गुगुं हालतय् नं भवन दयेकेगु जुइ धकाः अडान काःगुलिं थःपिं नं संघर्षय् कुहां वयेमाःगु खँ वय्कलं कनादिल ।

मेखे निलबाराही गुथिया दुजः जुजुकाजी महर्जनं आः स्कुल तयातःगु जग्गा तकं निलबाराही देगःयागु खः धासें उगु इलय् स्कुलयात धाःगुलिं थःपिंसं विरोध मयागु व आः ल्यं दनिगु सतलय् तकं स्कुलं मिखा तःगुलिं थःपिं विरोधय् कुहां वयागु खँ कनादिल । वय्कःया कथं आः सतः दुगु १० नम्बर कित्ताया जग्गाया फिल्ड बुकय् नं मन्दिर धकाः च्वयातःगु दु ।

अन भवन निर्माण यायेगु धकाः स्कुलयात ५ करोड तका वःगु जानकारी नं वय्कलं बियादिल । उगु थासय् थीथी इलय् नेवाःतय् पुजाआजा यायेमाःगु जूगुलिं सतः व देगःया भूमि संरक्षण यायेमाःगु खँ धाःगु दु । लिसें अन नेवाःतय् दिगुद्यःया पुजा यायेगु ज्या नं जुयाच्वंगु दु । न्हापा नं स्कुलं अन च्वंगु देगःया जग्गा व सतः कायेगु कुतः याःगु खःसां स्थानीय जनतां उकियात विफल याना बिउगु खः ।