सांसद चौधरीयात अझं मत्वःतीगु

येँ – सर्वोच्च अदालतं टिकापुर घटनाया द्वपनय् ज्वनातःम्ह सांसद रेशम चौधरीयात थुनामुक्त यायेत अस्वीकार याःगु दु । न्यायाधीश ईश्वरप्रसाद खतिवडा व पुरुषोत्तम भण्डारीया मंकाः इजलासं म्हिगः चौधरीयात थुनामुक्त यायेत अस्वीकार याःगु खः । कर्तव्य ज्यान मुद्दाय् कैलाली जिल्ला अदालत व उच्च अदालत दिपायलया आदेशयात सर्वोच्चं सदर यःगु खः ।

सर्वोच्च अदालतया आदेशय् धयातःगु दु, ‘चौधरीं आरोपित कसुर याःगु धकाः विश्वास याये फइगु पर्याप्त व मनासिब आधार विद्यमान दुगुलिं निजयात लिपा ठहरे बमोजिम जुइ कथं मुद्दा पुर्पक्षया निंतिं थुनाय् तयेगु कथं उच्च अदालत दिपायल व जिल्ला अदालत कैलालीया आदेश मनासिब खनेदु ।’

जिल्ला अदालतया २०७४ फागुन १४ गतेया आदेशया विरुद्ध चौधरीं उच्च अदालत दिपायलय् मुद्दा दायर याःगु खः । उगु अदालतया विसं २०७४ चैत २२ गतेया आदेश विरुद्ध २०७५ य् सर्वोच्च अदालतय् वंगु खः । चौधरीयात २०७२ भदौ ७ गते कैलालीया टिकापुरय् जूगु प्रहरी व आन्दोलनकारी दथुइ जूगु झडपय् छम्ह मचा सहित च्याम्हेसिया हत्या जूगु घटनाया मू आरोपी कथं कयातःगु दु ।