सरकारया नीति तथा कार्यक्रम, १० हजार लिटर लः सितिकं

येँ (नेपालभाषा टाइम्स)÷ सरकारं लय् १० हजार लिटर तक लः छ्यलीगु परिवारयात निःशुल्क लः बीगु खँ धाःगु दु । अथेहे २० युनिट स्वयां म्हो मत छ्यलीपिं गरिब व विपन्नतय्त निःशुल्क मत बीगु व ५० युनिट तक मत छ्यलीपिं उपभोक्तातय् निंतिं मतया महसुल म्हो यायेगु खँ धाःगु दु ।

सरकारपाखें म्हिगः न्ह्यब्वःगु नीति व कार्यक्रमय् थ्व खँ धयातःगु खः । म्हिगः गठबन्धन सरकारपाखें सूचना तथा संचार मन्त्री रेखा शर्मां सिंहदरबारय् छगू ज्याझ्वःया दथुइ सरकारया नीति व कार्यक्रम न्ह्यब्वःगु खः ।

अथेहे सरकार पूर्णता जूगु खुला दुने नागरिकता ऐन पारित यायेगु व नागरिकता कायेगु निंतिं दयाच्वंगु लैंगिक विभेदता नं चिइकेगु प्रतिबद्धता नीति व कार्यक्रमय् प्वंकातःगु दु ।

थ्वहे झ्वलय् सरकारं याकनं हे प्रदेश प्रहरी समायोजना यायेगु खँ नं धाःगु दु । सरकारं पूर्णता काःगु खुलाया दुने प्रदेशतलिसे समन्वय यानाः प्रदेश प्रहरी समायोजना यायेगु खँ नीति व कार्यक्रमय् न्ह्यथनातःगु दु ।

अथेहे याकनं हे अधिकारसम्पन्न उच्चस्तरीय प्रशासनिक पुर्नसंरचना आयोग दयेकेगु खँ नं सरकारया प्राथमिकताय् लाःगु दु । मन्त्री शर्मां न्ह्यब्वःगु नीति व कार्यक्रमय् केन्द्रीकृत प्रशासनिक संरचनायात रुपान्तरण यायेत व संघीय संरचनायात चुस्त व दुरुस्त यायेत थ्व आयोग दयेकेगु खँ धयातःगु खः । थुकिया लिसें प्रदेश व स्थानीय तहया निंतिं आवश्यक कर्मचारीतय् व्यवस्थापनय् सहजीकरण यायेगु प्राथमिकता नं सरकारया दु ।

अथेहे सार्वजनिक ज्या यायेबलय् नागरिकताया प्रमाणपत्र नं माःगु राष्ट्रिय परिचय पत्र नं मालीगु झन्झटयात नं मापदण्ड दयेकाः चीकेगु खँ धाःगु दु ।
सरकारं दलित, गरिब, विपन्न व विभेदय् लानाच्वंपिं सकसितं संघीयताया लबः कायेफइकथं ज्या यायेगु धाःसा दलित, वादी, सीमान्तकृत व लोपोन्मुख जाति लिसें लिउने लानाच्वंगु समुदाय व क्षेत्रया उत्थानया निंतिं बजेट फ्यायेगु खँ नं धाःगु दु । थुकिया लिसें सरकारं विदेशय् च्वनाच्वंपिं नेपाःमितय्सं नं मतदान यायेदइगु व्यवस्था याइगु जूगु दु । अथेहे शान्ति प्रक्रिया व संक्रमणकालीन न्यायसम्बन्धी ल्यंदुगु ज्या निदँया दुने पूवंकेगु खँ नं सरकारं धाःगु दु ।

थौंकन्हय् तसकं चर्चा वयाच्वंगु मिटरब्याज बारे नं नीति व कार्यक्रमय् न्ववानातःगु दु । सरकारं मिटरब्याजरयात दण्डनीय अपराध जुइगु कथं कानुन संशोधन यायेगु, थ्व सम्बन्धय् अपराध नियन्त्रण सिफारिस कार्यदलया २०७९ भाद्र २७या प्रतिवेदनयात कार्यान्वयन यायेगु व अधिकारसम्पन्न जाँचबुझ आयोग गठन यायेगु नं धयातःगु दु ।

‘थ्व राष्ट्रिय सहमतिया कार्यक्रम खः’
प्रधानमन्त्री पुष्पकमल दाहालं सार्वजनिक जूगु नीति व कार्यक्रम राष्ट्रिय सहमतिया हे जूगु दावी यासें कांग्रेस सभापति शेरबहादुर देउवाया नेतृत्वया सरकार व वयां न्ह्यःया गठबन्धन सरकारं दयेकूगु न्यूनतम साझा कार्यक्रमया बांलाःगु विषययात परिमार्जित यानाः दुथ्याकागु जूगुलिं थ्व राष्ट्रिय सहमतिया हे नीति व कार्यक्रम जूगु खँ वय्कलं धयादीगु दु ।