सिद्धिदास प्रतिष्ठानया ग्वसालय् साहित्यिक मुँज्या

ख्वप – सिद्धिदास प्रतिष्ठान ख्वपया ग्वसालय् वंगु शनिवाः महाकवि सिद्धिदास महाजुया १५१ क्वःगु बुदिंया लसताय् छगू साहित्यिक मुँज्या जुल । प्रतिष्ठानया नायः नरेन्द्रभक्त हाडाया सभापतित्वय् जूगु साहित्यिक मुँज्याय् कवि योगेन्द्र प्रधान मूपाहांकथं झायादीगु खः ।

ज्याझ्वलय् पूर्ण वैद्य, नारद वज्राचार्य, राजभाइ जकःमि, सौरभ शाक्य, राजेन मानन्धर, श्याम आशा, शम्भुमान श्रेष्ठ, गोविन्दमान श्रेष्ठ, धर्म राजकर्णिकार, हरिशरण शर्मा राजोपाध्याय, सुलोचना सैंजू, राकेश भाजु, न्हुछेभक्त कवांपिंसं थःथःगु रचना पाठ यानादीगु खः ।ज्याझ्वलय् विशेष पाहांकथं झायादीम्ह त्रिरत्न शाक्यं महाकवि सिद्धिदास महाजुया मूल्यांकन व अध्ययन यायेबलय् उगु ईया परिस्थितियात कयाः बांलाक थुइकेगु कुतः यायेमाः धयादिल ।

लिसें चन्द्र शम्शेरया पालय् भाषा साहित्यप्रति चरम दमन जुयाच्वंगु ई उकिसनं नेपालभाषा व साहित्यया नांतकं काये मजिउगु अवस्थाय् नं सिद्धिदास महाजुं दकलय् अप्वः साहित्य सिर्जना यानाः नेपालभाषाया साहित्यया धुकू जायेकाः भाषा सेवा यानादीगु वय्कलं धयादिल ।

ज्याझ्वःया सभापतिया थासं प्रतिष्ठानया नायः हाडां नेवाः जातिया नापनापं सिद्धिदासयात नं म्वाका तयेगु खः धइगु जूसा नेवाःतय् मू पहिचान जुयाच्वंगु नेवाः भाय् म्वाकातयेमाः धासें सिद्धिदास महाजुया ‘भाषा म्वाःसा जाति म्वाइ’ धइगु धापूयात सार्थक यायेकथं न्ह्याः वनेगु खःसा दक्वं ब्वनेकुथिइ मांभासं आखः ब्वनेगुयात अनिवार्य याना यंकेगु स्वयेमाः धयादिल ।

राजा शाक्य, कृष्णभक्त बोडे, गोविन्दमान श्रेष्ठ लगायतया साहित्यकारपिनिगु उपस्थिति दुगु ज्याझ्वलय् गणेशभक्त शिल्पकारं लसकुस यानादीगु खःसा लोकेन्द्र अर्यालं सुभाय् देछानादीगु खः ।