इतुंबहालय् लिपि स्यंपिंत दसिपौ लःल्हात

येँ – इतुंबहाः सुधार समिति व येँ महानगरपालिका २४ वडाया मंकाः ग्वसालय् नेपाल गुथिपाखें न्हयाकूगु लछियंकंया नेपाल लिपि स्यनेज्याय् ताःलाःपिंत शनिवाः इतुंबहालय् छगू ज्याझ्वःया दथुइ दसिपौ व मेडल इनेज्या जुल ।समितिया नायः मनोज शाक्यया सभापतित्वय् जूगु उगु ज्याझ्वलय् प्रदेश नं. ३ या सांसद राजेश शाक्य मूपाहाँ कथं झायादीगु खः ।

ताःलाःपिं सकसितं समितिया नायः शाक्य, सांसद शाक्य, २४ वडाया नायः बालकृष्ण श्रेष्ठ, नेपाल लिपि गुथिया नायः निरञ्जन ताम्राकारपिंसं दसिपौ, मेडल व लिच्वःपौ लःल्हाःगु खः । लिपि कक्षय् प्रशिल शाक्य न्हाप, निलिमा महर्जन लिउ व सदिक्षा शाक्य लियांलिउ लाःगु खः ।ज्याझ्वलय् लिपा स्यनामि शरद कसाःयात समितिया नायः शाक्यं हनापौ लःल्हानादीगु खः ।

अथेहे ब्वँमिपिनिपाखें नं स्यनामियात बुद्धया मूर्ति लःल्हाःगु खः । लिपि स्यनेज्याय् विशेष ग्वाहालि यानादीपिं गुथिया पुलांम्ह नायः प्रतापमान शाक्य, दुजःपिं पुष्परत्न तुलाधर, लुमिन ताम्राकार व इतुंबहाः मिसा पुचःया नकिं भुवन हेरा शाक्ययात नं लुमन्ति चिं लःल्हाःगु खः । अथेहे लिप स्यनेज्याय् थीथी कथं ग्वाहालि यानादीपिंत खादा क्वखायेकाः हनेज्या जूगु खः ।

समितिया न्वकु रत्नाकर वज्राचार्यं न्ह्याकूगु ज्याझ्वलय् छ्याञ्जे सनम शाक्यं लसकुस न्वचु बियादीगु खःसा दांभरि हितेस शाक्यं पाहाँपिंत खादा क्वखायेकाः लसकुस यानादीगु खः ।समितिपाखें जेठ १५ गते निसें रञ्जना लिप स्यनेज्या नं न्ह्याकीगु जूगु दु ।