खुगू सम्पदा वस्तीया पुनर्निर्माण तयारी

येँ – तःभुखाचं प्रभावित खुगू सम्पदा वस्तीया पुनर्निर्माण यायेगु निंतिं पुनर्निर्माण प्राधिकरणं अध्ययन याइगु जूगु दु । स्वनिगःया स्वंगू व स्वनिगलं पिनेया स्वंगू यानाः खुगू स्वनिगलं पिने स्वंगू यानाः खुगू सम्पदाया पुनर्निर्माण यायेत्यंगु खः ।

स्वनिगलं पिनेया नुवाकोटया साततल्ले दरवार, गोरखाया गोरखा दरवार दोलखाया दोलखा बजाः पुनर्निर्माण यायेगु निंतिं अध्ययन यायेत्यंगु खः । अध्ययन यायेगु निंतिं प्राधिकरणं १ करोड २० लाख तका बजेट फ्याःगु दु । उगु सम्पदा वस्तीया स्मारक, फल्चा, ल्वहंहिति व मेमेगु संरचना दयेकेगु तयारी प्राधिकरणं यानाच्वंगु दु ।

थ्व खुगुलिं सम्पदा वस्तीया पुनर्निर्माण यायेगु निंतिं छगू वस्तीया निंतिं ५ करोड बजेट फ्यायेधुंकूगु दु । वस्ती निर्माण यायेत मुक्कं ३० करोड तका खर्च जुइगु खँ प्राधिकरणं धाःगु दु । वस्ती पुनर्निर्माण लिपा मौलिक सम्पदाया संरक्षण जुइगु जक मखु आन्तरिक पर्यटन अप्वयाः रोजगारी नं अप्वइगु खँ प्राधिकरणं धाःगु दु ।

अथेहे भुखाचं क्षतिग्रस्त न्हय्गुलिं विश्व सम्पदाया धलखय् दुथ्याःगु क्षेत्रया संरक्षण व विकासया नितिं अध्ययन यायेत २० लाखया दरं बजेट फ्यागु दुसा ५ करोड तका पुनर्निर्माणया निंतिं फ्याःगु दु ।