तोखाय् नं चले जुल पालिकाया डोजर

येँ (नेपालभाषा टाइम्स)- तोखा नगरपालिकां थःगु पालिका दुने सार्वजनिक जग्गा मिचे यानाः दयेकातःगु अवैध संरचना चीकेगु शुरु याःगु
दु । नगर दुनेया सार्वजनिक जग्गा कब्जा यानाः दयेका तःगु टहरा आदि थेंज्याःगु संरचना डोजरं थुना छ्वःगु खः ।

तोखा नगरपालिकाया मेयर प्रकाश अधिकारीया कथं तोखा–८ या दुप्चेश्वर त्वालय् थीथी थासय् दयेकातःगु संरचना चीका छ्वःगु खः । ताः इलंनिसें नगर दुनेया सार्वजनिक जग्गा व्यक्तिं भोगचलन याना वयाच्वंगुलिं बाध्य जुयाः चीकेगु ज्या जूगु खँ वय्कलं धयादीगु दु ।

वय्कलं धयादिल, ‘संरचना थुनेत तःक्वःमछि सुचं बियाः व प्रत्यक्ष नापलानाः इनाप यानाः नं संरचना चीकेगु ज्या मयाःगुलिं नगरपालिकां डोजर हे हयाः चीकेमाःगु खः । नगर दुनेया फुक्कं सार्वजनिक जग्गा नगरपालिकां संरक्षण याये माःगुलिं चीकेगु ज्या जूगु खः ।’