ओलीं सत्ता नं बचे यात पार्टी नं बचे यात

येँ- पूर्ण बहुमतया सरकार क्वःदलेधुंकाः हानं मेगु धारा छ्यलाः पुनः प्रधानमन्त्री जुइत ताःलाःम्ह एमाले अध्यक्ष केपी शर्मा ओलीया थुगु राजनीतिक ‘मूभ’ यात गुलिस्यां राजनीतिक चतुरता धकाः व्याख्या यानाहःगु दुसा गुलिस्यां सत्तामोहया मेगु रुप । तर व्याख्या न्ह्यागु याःसां प्रम ओलीं थ्वहे छगू मूभपाखें निगू उपलब्धी चूलाकादीगु धाःसा यथार्थ खः । वय्कलं आः ल्ह्वनादीगु पलाःपाखें छखे थःगु प्रधानमन्त्रीया कुर्सी बचे यानादीगु दुसा मेखे विभाजित जुइत्यंगु पार्टीया एकता नं बचे यानादीगु दु ।

पार्टीया वरिष्ठ नेता माधव नेपाल पक्षया सांसदतय्सं यदि मंकाः राजीनामा बिया वंगु जूसा ओली सत्ताच्युत जुइगु जक मखु एमाले नं विधिवत रुपं विभाजन जू वनीगु खः । थुकिं यानाः ओलीया सत्ता जक गुमे जुइगु मखु वय्कः अध्यक्ष जुयाच्वंगु पार्टी समेत कमजोर जुइगु अवस्था वइगु खः । तर वय्कलं थ्व नितां अवस्थापाखें थःत बचे यानादीगु दु ।

माधव नेपाल पक्षं माग याः थें पार्टीयात २०७५ जेठ ३ गतेया अवस्थाय् यंकेबलय् वय्कःयात हानी जुइगु छुं नं खँ मदु । स्वयम् एमाले दुने नं नेपाल पक्षया थ्व माग पूरा यायेमाः धाइपिं नेतात मदुगु मखु । उकिं नेपाल पक्षया थ्व माग पूरा यानाः वय्कलं गुलि गुमे यानादीगु दु व स्वयां यक्व प्राप्त यानादीगु दु ।

छखे सत्ताच्युत व मेखे विभाजित पार्टी ज्वनाः चुनावय् वनेमाःगु जूसा वय्कः बांमलाक पराजित जुइ मालीगु नं निश्चित खः । आः सत्ता बचे यानाः पार्टीया एकता नं कायम हे जूगु कारणं चुनावय् वनेमाःसां नं थःगु बल्लाःगु उपस्थिति क्यने फइगु अवस्था ब्वलंगु दु । यदि अथे मजूगु खःसा सत्ता गुमे जूगु सिबें नं पार्टी विभाजन याःगु खँय् वय्कलं कलंक क्वबी मालीगु खः ।

गन तक माधव नेपाल पुचः दुहां वयेवं पार्टी दुने हानं गुटबन्दी ब्वलनीगु खतरा दु धइगु खँ दु, अज्याःगु खतरा माधव नेपालपिं दुहां मवःसां नं ब्वलनी मखु धाये फइ मखु । छगू जीवन्त पार्टीइ गुटबन्दी दया हे च्वनी । माधव नेपालया गुट मदुसा कन्हय् ईश्वर पोखरेलया गुट जूसां ब्वलनी । पार्टीइ उकिया संकेत खने नं दये हे धुंकूगु दु । उकिया व्यवस्थापन याना वनेगु हे नेतृत्वया खुबी जुइ ।

सम्बन्धित बुखँ

LEAVE YOUR COMMENTS