आरआरय् नेपालभाषा विद्यार्थीतय् गुरुपुन्हि
येँ(नेपालभाषा टाइम्स)- रत्नराज्य लक्ष्मी (आरआर) क्याम्पसया नेपालभाषा विषयया विद्यार्थीतय्सं गुरुपुन्हि हंगु दु । क्याम्पसय् एमए व बीए तगिमय् नेपालभाषा विषय कयाः अध्ययन यानाच्वंपिं विद्यार्थीतय् सहभागिता दुगु खः ।
क्याम्पस प्रमुख जीवनधर ज्ञवालीया प्रमुख आतिथ्यताय् जूगु ज्याझ्वलय् वय्कलं क्याम्पसय् गुरुपुन्हि हनेगु ज्या यानादीगुलिं विद्यार्थीतय्त सुभाय् देछासे थुकथंया ज्याझ्वःयात निरन्तरता बिया वनेमाःगु खँय् बः बियादिल । लिसें वय्कलं वइगु दिनय् विद्यार्थीतय्सं याइगु ज्याझ्वःयात क्याम्पसपाखें नं फक्व ग्वाहालि यायेगु प्रतिवद्धता प्वंकादिल ।
ज्याझ्वलय् नेपालभाषाया विभागीय प्रमुख विष्णुप्रसाद ज्ञवाली, नेपालभाषाया प्राध्यापकपिं प्रा. डा. चन्द्रमान वज्राचार्य, मदनसेन वज्राचार्य, दीपा महर्जन, सुनिता राजभण्डारी लगायतया शिक्षकपिंत नेवाः परम्पराकथं ख्यें सगं बियाः हनेज्या नं याःगु खः ।
उगु इलय् प्रा. डा. वज्राचार्यं क्याम्पसया नेवाः विद्यार्थीतय् संगठन नेवाः विद्यार्थी युनियनया आपालं कुतः लिपा एमए व बीए तगिमय् नेपालभाषा अध्यापन हाकनं न्ह्याके फुगु खँय् लसता प्वंकादिल ।
शिक्षक वज्राचार्यं गुरुपुन्हि हनेगु विद्यार्थीतय् निंतिं सौभाग्यया खँ जूगु धासें ब्वँमिपिंत नं फत्तले सक्षम, योग्य यायेगु गुरुपिनिगु जिम्मेवारी खः धयादिल । लिसें वय्कलं थ्व हाथ्यायात स्वीकार यायेत सकल गुरुपिं तयार जुइमाः धयादिल ।
ज्याझ्वःया सभापति शंकर थापां नेपालभाषा विषयया महत्वयात कुलादिसें क्याम्पस प्रशासनं थ्व विषयय् अप्वः प्रचार प्रसार यायेमाःगु खँय् बः बियादिल ।
उगु इलय् क्याम्पसया शिक्षिकापिं दीपा महर्जन, सुनिता राजभण्डारी, ब्वँमि प्रविण शाहीं म्येँ न्यंकादीगु खःसा कृता वज्राचार्यं चिनाखँ न्यंकादीगु खः ।
LEAVE YOUR COMMENTS