यौन मिया: सर्टिफिकेट हयाच्वन धाःम्ह मन्त्रीया राजीनामा माग
येँ – नेपालय् मेडिसिन ब्वने मखनाः बंगलादेशय् ब्वं वनाच्वंपिं नेपाःया मिसापिं विद्यार्थीतय्सं अन डिग्रीया सर्टिफिकेट कायेगु लागिं यौन व्यवसाय समेत याये मालाच्वंगु दु धकाः कानुन मन्त्री शेर बहादुर तामाङं न्ववानादीगु खँयात कयाः व्यापक विरोध जूगु दु ।
वय्कलं बियादीगु थ्व धापूया बारे छानबिन यासें वय्कःया राजीनामा माग यासें म्हिगःनिसें थनया मरुइ सत्याग्रह समेत सुरु जूगु दु ।
मन्त्री तामाङं येँया छगू स्कूलया ज्याझ्वलय् न्ववायेगु झ्वलय् बंगलादेशय् नेपाःया छात्रातय्सं थःगु यौन मियाः डिग्रीया सर्टिफिकेट काये मालाच्वंगु दु धकाः न्ववानादीगु खः ।
वय्कःया थज्याःगु धापू पिहां वयेवं बंगलादेशय् आखः ब्वनाच्वंपिं नेपाःमि विद्यार्थीतय्सं छगू वक्तव्य पिकासें मन्त्री तामाङया थ्व धापूया कारणं थःपिं मर्माहत जुयागु खँ धाःगु दु । वल्र्ड वाइड नेपालिज स्टुडेन्ट्स अर्गनाइेजेशन – बंगलादेशपाखें पिकाःगु उगु वक्तव्यय् मन्त्रीया थ्व धापुतिं यानाः नेपालय् च्वनाच्वंपिं थः अभिभावकतय्त समेत तनाव जूगु खँ नं धयातःगु दु ।
नेपाः सरकारं थ्व विषयय् छानबिन यानाः सत्यतथ्य खँ सार्वजनिक यायेत नं नेपाःमि विद्यार्थीतय्सं इनाप याःगु दु ।
थ्व स्वयां न्ह्यः बंगलादेशय् आखः ब्वनाच्वंपिं नेपाःमि छात्रातय्स सर्टिफिकेट कायेगु लागिं अन यौन मीगु ज्या समेत यानाच्वंगु दु धकाः नेपाःया मेडिकल माफिया कथं नांजाःम्ह बी एण्ड सी मेडिकल कजेलया कार्यकारी अध्यक्ष दुर्गा प्रसाइँ छगू पत्रकार सम्मेलनय् न्ववानादीगु खः । विदेशय् नेपाःया छात्रात थःगु यौन मियाः आखः ब्वने मालाच्वंगु दु धासें नेपालय् हे मेडिकल कलेज चायेकल धाःसा अज्याःगु अवस्था वइ मखु धकाः वय्कलं दावी यानादीगु खः । वय्कः डा. केसीया कट्टर विरोधी खः ।
कानुन मन्त्रीया स्पष्टीकरण
थःगु धापूयात कयाः व्यापक विरोध जुइवं कानुन मन्त्री शेरबहादुर तामाङं छगू वक्तव्य पिकासें थम्हं छगू प्रशंगय् धयागु खँयात मेगु प्रशंगं व्याख्या जूवंगु खँ कनादीगु दु । थःगु वक्तव्यय् वय्कल बंगलादेशय् आखः ब्वं वनाच्वंपिं छुं विद्यार्थीतय्सं आत्महत्या समेत याःगु व मेगु नं हिंसाजन्य घटनाया बारे उजुरी वयाच्वंगु सन्दर्भय् वय्कलं अथे धयागु खँ कनादीगु दु । वय्कलं नेपालय् हे मेडिकल कलेज चायेकाः आखः ब्वनेगु व्यवस्था जुल धाःसा विदेशय् अथे दुःख सिउ वने माली मखु धइगु सन्दर्भय् अथे धयागु खँ नं स्पष्ट यानादिल । वय्कःया थ्व धापूयात कयाः मन्त्री तामाङयात पदं चीकेमाः धकाः समेत व्यापक विरोध जुयाच्वंगु दु ।
LEAVE YOUR COMMENTS