स्थायी कमिटीइ प्रचण्ड बल्लाः

येँ- एमाले व माओवादी मिले जुयाः दयेकूगु नेकपाय् पुलांपिं एमाले नेतातय् दथुइ जुयाच्वंगु गुटबन्दीं यानाः स्थायी कमिटीइ माओवादी नेता प्रचण्डया बहुमत खने दया वःगु दु । नेकपाय् थौंकन्हय् पुलांपिं एमाले नेतात प्रधानमन्त्री केपी ओली व माधव नेपाल–झलनाथ खनालया गुट खने दयाच्वंगु दु । प्रधानमन्त्री ओली व नेता नेपाल दथुइ ला स्पष्ट गुटबन्दी खने दयेधुंकूगु दु ।

गुटबन्दीया कारणं ओली व नेपालयाके थःपिंत समर्थन याइपिं मेपिं स्थायी समितिया दुजःत झिंनिम्ह झिंनिम्ह जक दयाच्वंगु दुसा प्रचण्डयात समर्थन याइपिं धाःसा झिंन्हय्म्ह थ्यनाच्वंगु दु । निगू पार्टी एकीकरण लिपा जूगु नेकपाया स्थायी कमिटीइ माओवादीपाखें झिंगुम्ह दुथ्याःगु खः । थुपिं झिंगुम्ह मध्ये नारायणकाजी श्रेष्ठ व गिरिराजमणि पोखरेल जक प्रचण्ड– पाखें तापाक दु । मेपिं अझ नं प्रचण्डया समर्थनय् दुगुलिं पुलांपिं एमाले नेता मवःसां प्रचण्ड बल्लानाच्वंगु दु । प्रचण्ड लिसे आः रामबहादुर थापा, देव गुरुङ, पम्फा भुसाल, वर्षमान पुन, शक्ति बस्नेत, जनार्दन शर्मा, हरिबोल गजुरेल, चक्रपाणी खनाल, लिलामणि पोखरेल, मणि थापा, मातृका यादव, गणेश साह, लेखराज भट्ट, देवेन्द्र पौडेल व टोपबहादुर रायमाझी दु ।

आः माधव नेपाल व झलनाथया गुटय् नारायणकाजी दुहां वंसां हे थ्व गुटय् मुक्कं झिंप्यम्ह जक दइगु खनेदु । तटस्थ च्वनाच्वंपिं नेतातय्सं साथ बिउसां नं ओली व नेपालया गुटं प्रचण्ड लिसे बराबरी याये मफइगु खँ धाःगु दु ।

केपी ओलीया पक्षय् ईश्वर पोखरेल, बिष्णु पौडेल, सुवास नेम्वाङ, शंकर पोखरेल, प्रदीप ज्ञवाली, पृथ्वी सुब्बा गुरुङ, रघुवीर महासेठ, किरण गुरुङ, सत्यनारायण मण्डल, छविलाल विश्वकर्मा व बिष्णु रिमाल दु । मेखे माधव–झलनाथ गुटय् वामदेव गौतमया लिसें भीम रावल, अष्टलक्ष्मी शाक्य, युवराज ज्ञवाली, रघुजी पन्त, बेदुराम भुषाल, घनश्याम भुषाल, योगेश भट्टराई, सुरेन्द्र पाण्डे व भीम आचार्यपिं दु ।
पुलांपिं एमाले नेतातय् दथुइ गुटबन्दी जुयाच्वंसां प्रचण्डं धाःसा अझं ओलीयात हे साथ बियाच्वंगु खँ धाःगु दु ।

प्रधानमन्त्रीया रुपय् ओलीं यानाच्वंगु ज्या खनाः तम्वयाच्वंसां प्रचण्ड आः तुरुन्त ओलीयात त्वःतेगु पक्षय् धाःसा मदुनिगु खँ धाःगु दु । प्रचण्डं अझ नं थःत नापलाः वयाच्वंपिं नेतातय्त ओलीलिसे मिले जुयाः हे ज्या यायेगु धयाच्वंगु खँ धाःगु दु । प्रचण्डं ओलीलिसे मिले जुया वनेगुया विकल्प मदु धासें यदि आः हे ओलीयात त्वःतल धाःसा एकीकरण प्रक्रियाया निंतिं आःतक जूगु ज्या फुक्क भताभुङ्ग जुइ धया च्वनादीगु दु ।

आः नारायणकाजी छम्ह बाहेक माओवादीं वःपिं नेतात फुक्क प्रचण्डया लाइनय् हे दुगु खँ धाःगु दु । नारायणकाजी धाःसा माधव नेपालया पक्षय् वनेफुगु खँ धाःगु दु ।

सम्बन्धित बुखँ

LEAVE YOUR COMMENTS