केपी ओली प्रधानमन्त्री नियुक्त, देउवाया राजीनामा

येँ– एमाले अध्यक्ष केपी ओली थौं प्रधानमन्त्री नियुक्त जुयादीगु दु । राष्ट्रपति विद्यादेवी भण्डारीं वय्कःयात संविधानया धारा ७६ या उपधारा २ कथं प्रधानमन्त्री नियुक्त यानादीगु खः ।
एमाले अध्यक्ष ओली एमाले व माओवादी केन्द्रया प्रतिनिधि सभा सदस्यतय् समर्थन सहित थौं सुथय् ९ बजे शितल निवास वनाः प्रधानमन्त्रीया दावी न्ह्यब्वयादीगु खः ।
प्रधानमन्त्री शेरबहादुर देउवां देय्या नामय् संवोधन यासें राजीनामा बीवं ओलीयात प्रधानमन्त्री नियुक्त याःगु खः । देउवां प्रधानमन्त्री निवास वालुवाटारं देय्या नामय् संवोधन यानादीगु खः । अनं वय्कः तप्यंक राष्ट्रपति निवास शितल निवास वनाः राजीनामा लःल्हानादीगु खः ।
केपी ओली आः नेपाःया ४१ औं प्रधानमन्त्री जुयादीगु दु ।