पूर्वया वडा ज्याकुथी तालाबन्दी, ‘कोशी’ नामाकरण विरुद्ध थौं येँय् पहिचानवादीतय् प्रदर्शन

येँ (नेपालभाषा टाइम्स)- ‘कोशी प्रद’ नां खारेज यायेमाःगु माग यासें म्हिगः धरान उपमहानगरपालिका व अनया नीगुलिं वडाय् तालं ग्वया बिल । पहिचानवादी संस्थात किरात याक्थुङ चुम्लुङ, किरात राई यायोक्खा, नेपाल आदिवासी जनजाति महासंघ लगायत जानाः अन तालं ग्वःगु खः । आन्दोलन– कारीतय्सं अन ज्या यानाच्वंपिं कर्मचारीतय्त ज्याकुथिं पिकयाःलि अन तालं ग्वया बिउगु खः ।

आन्दोलनकारीतय्सं नगरपालिका ज्याकुथी तालं ग्वः वये छघौ न्ह्यः हे अन सुरक्षाकर्मीत च्वनाच्वंगु खः । आन्दोलनकारीतय्सं नगरपालिकाया मू ध्वाखाय् तालं ग्वयाः कोणसभा याःगु खःसा धरान उपमनपाय् तयातःगु ‘कोशी प्रदेश’ च्वयातःगु छाप व लेटरप्याड च्याका बिउगु खः ।

थ्व स्वयां न्ह्यः आन्दोलनकारीतय्सं धरानया वडा ५ व १५ या ज्याकुथी नं तालं ग्वया बिउगु खः । संघीय लोकतान्त्रिक राष्ट्रिय मञ्च सुनसरीया अध्यक्ष अमर इजमया कथं निगूगु चरणया आन्दोलन अन्तर्गत चैत १४ निसें १७ गते तक स्थानीय तहया थीथी वडा समितिया ज्याकुथी तालं ग्वयाः हाकुगु ध्वाँय् ब्वयेकेगु, कोशी प्रदेश च्वयातःगु बोर्ड चीकेगु व लेटरप्याड च्याकेगु ज्याझ्वः दु । कोशी प्रदेशया विरुद्ध झिंप्यंगुलिं जिल्लाया स्थानीय तह व वडा समितिइ तालं ग्वयेगु ज्या नं न्ह्यानाच्वंगु दु । आन्दोलनकारीतय्सं मदुम्ह पद्म लिम्बुयात शहिद घोषणा यायेमाःगु माग नं याःगु दु ।

थ्वहे झ्वलय् पहिचानवादीतय् आन्दोलनया कारणं यानाः कोशी प्रदेशसभाया बैठक नं अनिश्चित जूगु दु । पहिचानवादीतय्सं निरन्तर रुपं सांसद व मन्त्रीयात आक्रमण याये फइगु आशंका यासें प्रदेशया बैठक तयेत सभामुख हे तयार मदुगु खँ धाःगु दु ।

वंगु लछि न्ह्यः स्थगित जूगु कोशी प्रदेशसभाया बैठक आः गबलय् च्वनेगु धइगु अनिश्चित जूगु दु । वंगु फागुन १७ गते प्रदेशसभां ‘कोशी प्रदेश’ नामाकरण यायेधुंकाःलि आः तक छगू नं बैठक च्वने फुगु मदुनि ।

सभामुख बाबुराम गौतमं प्रदेशया नामांकरणयात कयाः विरोध यानाच्वंपिंलिसे वार्ता यायेमाःगु जुयाः बैठक मतयागु खँ धयादीगु दु । वय्कलं पहिचान आन्दोलन मत्थर जुइवं बैठक तयेफइगु खँ नं धयादीगु दु ।

थ्वहे झ्वलय् थौं न्हिनय् २ बजे येँय् नं ‘कोशी प्रदेश’ नामाकरणया विरुद्ध प्रदर्शन याइगु जूगु दु । प्रदेश नामाकरण विरुद्धया मंकाः संघर्ष समितिया इनापय् थनया फिब्व ख्यः व शान्तिबाटिकाय् प्रदर्शन यासें संसद भवन तक मार्च पास यायेगु ज्याझ्वः तयातःगु दु ।

नेपाल समाजवादी पार्टी समर्थित आदिवासी जनजाति संघ संस्थां कोशी प्रदेशया विरोध याःगु दु । नेपाल समाजवादी आदिवासी जनजाति महासंघया अध्यक्ष अनुप सिंह सुवाल, नेपाल समाजवादी नेवाः संघया अध्यक्ष माधव श्रेष्ठ, थारु संघया पिताम्बर महतो, मगर संघया कोमल मगर, तमु संघया राम गुरुङ, तामाङ संघया रादिप लामा व लिम्बु संघया टिका कन्दङ्वा पिसं म्हिगः मंकाः विज्ञप्ति पितबिसें विरोध प्वंकूगु खः ।

सम्बन्धित बुखँ

LEAVE YOUR COMMENTS