येँ महानगरया नीति तथा कार्यक्रम सर्वसम्मत

येँ – येँ महानगरपालिकाया नीति तथा कार्यक्रम सर्वसम्मतं पारित जूगु दु । वंगु असार ३ गते येँ महानगरया गुक्वःगु अधिवेशनया न्हापांगु न्हिं येँ महानगरपालिकाया प्रमुख विद्यासुन्दर शाक्यं आर्थिक दँ ०७८÷७९या निंतिं न्ह्यब्वयादीगु वार्षिक नीति तथा कार्यक्रम आइतवाःया सर्वसम्मतं पारित याःगु खः ।

महानगर प्रमुख शाक्यं न्ह्यब्वयादीगु उगु प्रस्तावय् असार ५ गते सहलह यायेगु ज्याझ्वः तयातःगु खःसां उपप्रमुख हरिप्रभा खड्गीलिसें नेपाली कांग्रेसपाखें निर्वाचिन जनप्रतिनिधितिय्सं प्रस्ताव अध्ययन यायेत निन्हुया ई माग यायेवं असार ७ गते च्वंगु बैठकं प्रस्तावयात सर्वसम्मतं पारित याःगु खः ।

बैठक च्वने स्वयां न्ह्यः उपप्रमुख व मेपिं जनप्रतिनिधिं नीति तथा कार्यक्रमय् दुथ्याकेमाःगु छुं छुं बुँदाया प्रस्ताव प्रमुख शाक्ययात लःल्हाःगु खःसा वयां लिपा बैठक न्ह्याःगु खः । उपप्रमुख व जनप्रतिनिधिया सुझाव ग्रहण यासें प्रमुख शाक्यं जनप्रतिनिधि जुइधुंकाः पार्टीया प्रतिनिधि मखसे वास्तविक जनप्रतिनिधि जुयाः स्वयेत इनाप यानादिल ।

‘निर्वाचनय् उम्मेदवारजुइबलय् दलपाखें टिकट कायेमाः । तर निर्वाचनय् विजय जुइधुंकाः झीपिं पार्टीया मखसे जनताया जनप्रतिनिधि जुइ ’, महानगर प्रमुख शाक्यं धयादिल, ‘जि नं एमालेया उम्मेदवार खः, चुनाव त्यायेधुंकाः जि समग्र रुपय् येँ महानगरपालिकाया मेयर खः, एमाले वा जितः मत बिउपिनि जक जि मेयर मखु । अथे हे उपप्रमुख, वडाअध्यक्ष व वडा सदस्यपिं नं गुगुं दलया मखसे जनप्रतिनिधि हे खः । जि थः निर्वाचित जुया वयेधुंकाः जिं उपमेयर, वडाअध्यक्ष, सदस्ययात गबलें नं उपेक्षा यानागु मदु । उकिं छिकपिंसं नं दल स्वयां नं जनताया हितयात ध्यानय् तयाः ज्या यानादिसँ, जिं नं वहे याये, यानाच्वनागु नं दु ।’

प्राप्त सुझावं नगरसभाय् पेश जूगु प्रस्तावयात अझ परिपक्व यायेत ग्वाहालि जुइगु विश्वास प्वंकादिसें वय्कलं नीति तथा कार्यक्रमय् असहमति प्वंकेमाःगु छुं न मदु, असार १० गते बजेट हयेमाःगु कानूनी प्रावधान दुगुलिं अझ सघन रुपं अध्ययन यानाः प्राप्त सुझावयात सकारात्मक रुप बियाः सशक्त याना यंकेगु जुइ धयादिल ।

सम्बन्धित बुखँ

LEAVE YOUR COMMENTS