जिपिं माओवादीइ विलिन जुइ मखु – नेपाल

येँ -नेकपा (एकीकृत समाजवादी) या अध्यक्ष लिसें संसदीय दलया नेता माधव नेपालं वइगु भदौ २३ गते न्ह्यः मन्त्रिपरिषद विस्तार जुइगु सम्भावना मदुगु खँ धयादीगु दु । म्हिगः सिंहदरवारय् संसदीय दलया ज्याकुथी थःगु पदभार ग्रहण यायेगु झ्वलय् वय्कलं सञ्चारकर्मीतय्त उगु खँ धयादीगु खः ।

नेता नेपालं भदौ २३ गते न्ह्यः मन्त्रिपरिषद विस्तार जुइगु सम्भावना मदु धासें धयादिल, ‘मन्त्रिपरिषद् विस्तारया विषयय् २२ व २३ गते तक सुनां नं न्ववाइ मखु, उकिया बारे आः छुं चर्चा जुयाच्वंगु दु, उकिया नितिं उपयुक्त इलय् सहलह यायेगु जुइ ।’

वय्कलं माओवादी केन्द्रया अध्यक्ष पुष्पकमल दाहालयात नापलानागु खःसांं मन्त्रिपरिषद विस्तार बारे सहलह मजूगु खँ धयादीगु दु । म्हिगः अध्यक्ष नेपाल व दाहाल दथुइ सहलह जूगु खः ।

वय्कलं थःगु पार्टी क्रान्तिकारी विचारया आधारय् निर्माण जूगुलिं थःगु पार्टी माओवादी केन्द्रय् विलिन जुइ धकाः वयाच्वंगु भ्रमय् मच्वनेत नं इनाप यानादिल । वय्कलं धयादिल, ‘जिमिगु पार्टी क्रान्तिकारी विचारया आधारय् निर्माण जूगु खः, थ्व केपी ओलीया निरंकुशता विरुद्ध विद्रोह यानाः नीस्वंगु पार्टी खः ।’

अध्यक्ष नेपालं केपी ओलीया भ्रमय् मच्वनेत नं पार्टीया प्रदेशसभाया सांसद लिसे जनप्रतिनिधिपिंत आह्वान यानादीगु दु । केपी ओली व वय्कःया मनूतय्सं झिगू बुँदे सहमतिया भ्रमपूर्ण व्याख्या यानाच्वंगु खँ न्ह्यथँसें अज्याःगु भ्रमय् मच्वनेत व थःगु पार्टीइ वयेत इनाप नं यानादीगु दु ।

उकथं हे अध्यक्ष नेपालं थःगु पार्टी विरुद्ध केपी ओलीं कुप्रचार यानाच्वंगु खँ न्ह्यथँसें उकियात फायाः न्ह्याःवनेत सफल जुइगु दावी नं यानादिल ।