पोर्चुगलय् शोभायात्रासहित स्वांयाःपुन्हि

येँ(नेपालभाषा टाइम्स)- शान्ति नायक भगवान बुद्धया जन्म, सम्बोधि लाभ व महापरिनिर्वाण प्राप्त याना बिज्याःगु त्रिसंयोग चूलाःगु दिंयात विश्वन्यंकं थीथी ज्याझ्वः यासें हंगु दु । २५६६ क्वःगु स्वांयाःपुन्हियात अन्तर्राष्ट्रिय बैशाख दिवसया रुपय् संयुक्त राष्ट्र संघ, अमेरिका लगायत थीथी देशय् तःजिक हंगु दु ।

थ्व हे झ्वलय् युरोपेली राष्ट्र पोर्चुगलय् नं २५६६ क्वःगु स्वांयाःपुन्हि तःजिक हंगु दु । विश्व शान्तिया अग्रदूत भगवान बुद्धया २५६६ क्वःगु स्वांयाःपुन्हि पोर्चुगलय् थीथी ज्याझ्वः यासें हंगु खः ।

पोर्चुगलया राजधानी लिस्बनय् वंगु बछलाथ्व स्वांयाःपुन्हिकुन्हु बुद्धमूर्ति सहित छगू शोभायात्रा याःगु खः । पोर्चुगलस्थित अवैतनिक नेपाली महावाणिज्य दूतावासया ज्याकूया संयोजनय् जूगु शोभायात्राय् आपालं नेपाली संघसंस्थाया सहभागिता दुगु खः । रोसियो सहरय् च्वंगु प्रासा दि कमर्सियों शुरु जूगु शोभायात्रा मार्टिम मुनिज पार्कय् थ्यंकाः क्वचाःगु खः ।

शोभायात्रा लिपा जूगु ज्याझ्वलय् लामा गुरु दावा लामां भगवान बुद्ध व वसपोलया उपदेशयात कयाः प्रवचन बियादीगु खः । ज्याझ्वलय् नेपाल आदिवासी जनजाति महासंघ पोर्चुगलया अध्यक्ष हेम गुरुङ, महावाणिज्य दूतया ज्याकूया जिपि सुवेदी लगायतं भिंतुना न्वचु बियादीगु खःसा बुद्धजयन्ती मूल समारोह समितिया संयोजकलिसें अवैतनिक महावाणिज्य दूत मकरबहादुर हमालं सुभाय् देछानादीगु खः ।

थ्व स्वयां न्ह्यः धर्मगुरुपाखें बुद्ध पुजा याःगु खःसा शोभायात्राय् भगवा बुद्धया किपा, बुद्धवाणी, बुद्धया उपदेश च्वयातःगु प्लेकार्ड, ब्यानर, नेपाःया राष्ट्रिय ध्वाँय्, बौद्ध ध्वाँय्, बुद्धया शान्ति सन्देशया ब्वज्या याःगु खःसा सांस्कृतिक शोभायात्राय् सहभागितसें थःथःगु जातीय म्हसीका पिब्वइगु वसः पुनाः ब्वति
काःगु खः ।