पेट्रोल हयेगु पाइप लायेगु ज्या शुरु

येँ – भारतया रक्सौलंनिसें नेपाःया अमलेखगञ्ज तक पेट्रोल हइगु पाइप लाइन लायेगु ज्या म्हिगः मंगलवाः निसें औपचारिक रुपं न्ह्यात । म्हिगः बाराया प्रमुख जिल्ला अधिकारी विजयनारायण मानन्धरं नेपाःपाखे पाइप लाःगु थासय् चां ल्हाकाः परियोजना शुरु यानादीगु खः ।

अमलेखगञ्जं निसें रक्सौल तक ३६.२ किलोमिटर व रक्सौलं मोतिहारी तक ३२ किलोमिटर पाइप लाइन लायेत्यंगुखः । प्रधानमन्त्री केपी ओली भारत भ्रमणया झ्वलय् थुगु परियोजनाया शिलान्यास जूगु खः । प्रम ओली व भारतीय प्रम नरेन्द्र मोदीं मंकाः कथं थुकिया शिलान्यास यानादीगु खः ।