ने. सं. ११४४ कौलाथ्व पारू - नःलास्वनेगु

समाजसेवी मिठ्ठाबहादुर मानन्धर लुमंति

समाजसेवी मानन्धरया बःचाहाकःगु जीवनी

समाजसेवी मिठ्ठाबहादुर मानन्धरया जन्म विक्रम संवत् १९९५ साल साउन २७ गते येँ न्ह्यःखा त्वाः २५ वडा (न्हापा २८ वडा)य् जूगु खः । अबु बेखानारायण व मां द्वारिकादेवी मानन्धरया वय्कःया माइलाम्ह काय खः । वय्कःया दाजु छम्ह (सुवर्णमान मानन्धर), किजा छम्ह (प्रेमशान्त मानन्धर) केहेँपिं निम्ह (मय्जु शकुन्तला मानन्धर व मय्जु सुशीला मानन्धर) यानाः न्याम्ह तःकेहेँपिं दु ।

विक्रम संवत् २०१० साल फागुन २७ गते बागबजारय् च्वंम्ह सत्यनारायण मानन्धर व मय्जु जोगमाया मानन्धरया म्ह्याय् मय्जु पूर्णदेवी मानन्धरनाप वय्कःया इहिपा जुल । सन्तानया रुपय् वय्कःया खुम्ह म्ह्याय्पिं दु – उर्मिला, निर्मला, प्रमिला, विमला, मिथिला व कमला । अथे हे च्याम्ह छय् व छम्ह छुइ नं दु ।

शिक्षा ः
मचाबलय् हाकु पाठशाला स्कुल (गोरखापत्र संस्थानया नापनापं च्वंगु स्कुल) अनं लिपा शान्ति निकुञ्ज स्कुलय् आखः ब्वनादिल । वय्कः शिक्षा कायेगु झ्वलय् इन्जिनियर श्री कृष्णराम श्रेष्ठजु नाप ब्वनादीगु खः । कासा ः वय्कः कासा ख्यलय् नं न्ह्यःने हे लाःगु खनेदु । कासाय् दकलय् यःगु चेस, बाघचाल, फुटबल खः । वय्कलं धुँकासा (बाघचाल)य् न्हाप लाकाः सिरपाः नं त्याकादीगु दु ।

समाजसेवी मिठ्ठाबहादुर मानन्धरजुं थः ब्वा बेखानारायण मानन्धरनाप पसलय् च्वनाः व्यापार यायेगु ज्या यानादीगु खःसा न्ह्यःखाया नांजाःगु बरफ पसः नं वय्कःपिनि थःगु हे खः । व्यापार यायेगु नापनापं वय्कः त्वालय् छम्ह समाजसेवी नं खः ।

न्ह्यःखा त्वालय् च्वंगु श्रीकृष्ण मन्दिर भजन मण्डलयाम्ह छम्ह नांजाःम्ह सक्रिय दुजः जुयाः भजन मण्डलया श्रीकृष्ण भगवानया छैथी कुन्हुया जात्राया निंतिं त्वालय् छेँखापतिं ल्हापं म्हयाः थःगु अध्यक्षताय् जात्रा सिधयेकाः छेँखापतिं हे प्रसाद इनादी । थ्व जात्रा दँय्दँय् न्यायेकीगु आतक नं दनि ।

थुगु भजन मण्डलया छेँ निर्माण यायेगुलि नं सक्रिय जुयादीम्ह भाजु मानन्धर भजन मण्डलया कार्यसमितिया मू दुजः, कोषाध्यक्ष पदय् च्वनाः वि.सं. २०७४ साल तक ज्या यानादिल । अथे हे समाजसेवाया झ्वलय् थःगु हे नेतृत्वय् सकलें जानाः त्वाःयापिंत लः त्वंकेगुया निंतिं लःट्यांकी दयेकेगुलि तःधंगु योगदान बियादिल ।

समाजसेवाया झ्वलय् वय्कःया नेतृत्व तसकं च्वछायेबहःगु खनेदु । थःगु त्वालय् नं माःमाःपिंत माःकथं ग्वाहालि यायेगु वय्कःया धर्म हे खः । थुगु हे झ्वलय् वि.सं. वि.सं. २०३९ सालय् न्ह्यःखाया जनचिकित्सालय् नीस्वनेगु लागि छम्ह अग्रज न्ह्यलुवाः जुयाः ज्या यानादिल ।

वय्कलं जीवंकाःछि श्रमदानया नापनापं माःमाःकथं सहलह, आर्थिक, सरसामान थम्हं स्वयाः मनं खं कथं चन्दा बियादिल थुकथं वय्कः चिकित्सालयया हित्तचित्तं ज्या यानादीम्ह वरिष्ठ सेवक खः । वय्कः जन चिकित्सालयया संस्थापक सदस्य नापनापं कोषाध्यक्ष, पदेन सदस्य, का.का.स. सदस्य नापनापं उपाध्यक्ष पदय् थ्यंक च्वनाः ज्या यानादीम्ह छम्ह व्यक्तित्व खः ।

वय्कःया सभापतित्वय् चिकित्सालयया आपालं जनचेतनामूलक ज्याझ्वःनं सम्पन्न जूगु दु । चिकित्सालयया निंतिं थःगु छेँय् थें हे आपालं आपाः ई फ्यानादीम्ह छम्ह सेवक खः । चिकित्सालय स्थापना जुइधुंकाः निरन्तर न्ह्याकेगु निंतिं डिडिसि दुरु मियाः न्यागः ध्यबा प्रति सिसी चन्दा म्हयाः चिकित्सालययात न्ह्याकेगु ज्या नं यानादिल ।

समाजसेवी…
न्हूगु नेतृत्वयात न्ह्याकेगु निंतिं न्हूपिं युवापिंत पद हस्तान्तरण नं वि.सं. २०७३ सालय् यानादिल । युवापिंत सरसल्हा बियाः ग्वाहालि नं यानादिल । वय्कः कन्यामन्दिर उच्च मा.वि. न्ह्यःखाया व प्रभात माध्यमिक विद्यालयया संचालक समिति, विद्यालय व्यवस्थापन समितिया नं दुजः खः ।

वय्कःपिं अर्थात न्ह्यःखा मानन्धर परिवार (सुवर्णमान मानन्धर, मिठ्ठाबहादुर मानन्धर, प्रेमशान्त मानन्धरपिनि बाज्या बराजुपाखें थनया श्रीघलय् च्वंगु प्रभात माध्यामिक विद्यालय स्कुलयात छुं ब्व जग्गा बियातःकथं दातापिं नं खः । थः म्ह्याय् मय्जु विमला मानन्धरं शिक्षा व स्वास्थ्यय् ग्वाहालि याये कथं स्वनातःगु ‘पूर्ण मिठ्ठा पलेस्वां’ अक्षय कोषय् नं तःधंगु ग्वाहालि यानादीगु दु ।

थुकथं हे वि.सं. २०३८ सालया स्थानीय चुनावय् तत्कालिन २८ वडाय् नगर सभासद पदय् नं अत्यधिक बहुमतं त्याकादिल । अथेहे वि.सं. २०४३ सालय् नं वडा अध्यक्ष पदय् अत्याधिक बहुमतं हे त्याकादीगु खः । वडा अध्यक्ष जुयाच्वंगु इलय् नं त्वाःया विकास निर्माण यायेगु ज्याया झ्वलय् वय्कलं चन्दा जनश्रमदानं दयेकातःगु त्वाः छेँय्या बाःवःगु ध्यबां मेगु छगू तल्ला थपे यायेगु ज्या नं जूगु दु ।

वि.सं. २०४६ सालय् तत्कालिन पञ्चायती व्यवस्थाया इलय् बहुदल आन्दोलनयात समर्थन याःगु द्वपनय् वय्कः लिसें (मेयर लगायत) श्री हरिबोल भट्टराई, तीर्थराम डंगोल व मेमेपिं वडा अध्यक्षपिं नं निलम्बन जुल ।

वय्कः कन्यामन्दिर गल्ली भगवती क्यबया भगवती मन्दिरय् न्हून्हूपिं द्यःपिं स्वनेगु ज्याय् नं न्ह्यलुवा जुयाः द्यःपिं तयाः त्वाःयापिं जः नापं मेमेपिं व २८वडाया सहयोगं देगः नं दयेकाः वि.सं. २०५९ सालं निसें वि.सं. २०७४ साल तक दछिइ छक्वः बुन्हि हना ज्या न्ह्याकाः धर्म यायेगुलिइ तल्लिन जुयादिल ।

सम्मान
– सार्कया झ्वलय् तत्कालिन प्रधानमन्त्री सम्माननिय मरिचमान सिंह पाखें तक्मा,
– धुंकासा (बाघचाल)य् तत्कालिन प्रधानमन्त्री सम्माननिय कीर्तिनिधि विष्टपाखें प्रमाणपत्र व ट्रफि
– जन चिकित्सालय न्ह्यःखापाखें ३५ वर्ष सेवा सम्मान–पत्र प्रभात माविपाखें सम्मान
– अग्रज सहकारीपाखें समाजसेवी सम्मान
– अथेहे थीथी थासय् सम्मान व हना ।