ग्वलया पिंगलामाईया जात्राय् कोषया पंगः

येँ- ग्वल देशय् न्यायेकीगु पिंगलामाई (वज्रेश्वर माता) या जात्रा न्ह्याकेत समस्या जूगु दु । पशुपति क्षेत्र विकास कोषं जात्राया मुआब्जा मबिउगुलिं थुगु दँय् उगु जात्रा न्ह्याके मफइगु अवस्था वःगु जात्रालिसे सरोकार दुपिंसं धाःगु दु ।

देशोद्धार पुजा संचालन समितिं छगू विज्ञप्ती जारी यासें कोषं थःपिं मुआब्जा मबिउगुलिं जात्रा न्ह्याकेत हे समस्या जूगु खँ धाःगु दु ।
सकल प्राणीया कल्याणया कामना यासें वाफय्, मि, लः व ल्वचं कइगु भय् मदयेमा धइगु कामना यासें थ्व जात्रा याइगु खःसा जात्रा याये स्वयां प्यन्हु न्ह्यः वैदिक व तान्त्रिक विधिकथं पुजा यायेमाःगु प्रचलन दु । थथे पुजा याइगुयात देशोद्धार पुजा धाइ ।

चिल्लागा द्वादशिया दिनय् जुइगु पिंगलामाईया जात्रा परम्पराय् जातीय सद्भावकथं ब्राम्हण, क्षेत्री, वैश्य व शुद्र प्यंगू वर्णयापिं च्वनाः पुजाया ज्या न्ह्याकेमाःगु परम्परा दु ।समितिं जारी याःगु विज्ञप्तीइ पशुपति क्षेत्र विकास कोषं थःपिनि पुर्खा पुजा संचालनया निंतिं तया थकूगु जग्गा अधिग्रहण यानाः उकिया मुआब्जा मबिउगुलिं जात्रा दीकेमाःगु अवस्थाय् थ्यंगु खँ न्ह्यथनातःगु दु ।

२०७० सालय् कोषं जात्रा संचालनया निंतिं तयातःगु १३ रोपनी जग्गा अधिग्रहण याःगु खः । जग्गा अधिग्रहण याये न्ह्यः उगु जग्गाया आयस्तापाखें हे जात्रा संचालन याना वयाच्वंगु खःसा वयां लिपा जात्रालिसे सम्बन्धित प्यंगुलिं वर्णयापिंसं थःथःगु हे आयस्रोतपाखें जात्रा संचालन याना वयाच्वंगु खः । तर आः वयाः जात्रा संचालन यायेत समस्या जूगु समितिं न्ह्यथंगु दु ।

जात्रा दित धाःसा स्वनिगःया हे आपालं जात्रा परम्पराय् तकं लिच्वः लाइगुलिं कोषं ध्यबा उपलब्ध मयाःसां थःपिनिगु हे आयस्रोतं जात्रायात निरन्तरता बीगु कुतः जुयाच्वंगु नं विज्ञप्तीइ धयातःगु दु । विज्ञप्तीइ धयातःगु दु, जात्रा दिके मजिउ धइगु जनचाहनायात ध्यानय् तयाः थःपिंसं थुकियात निरन्तरता बीगु तर, लिपा वनाः थुकिं लाइगु लिच्वःप्रति स्वयं कोष हे जिम्मेवार जुइ ।’

म्हय्यात धाःसा मुआब्जा बीधुंकूगु तर गुथ्याःतय्त धाःसा बीत अलमल यानाच्वंगु धासें कोषं धाःकथं संस्था दर्ता यानाः बैंक खाता तकं चायेकेधुंकूगु अवस्थाय् पुजा संचालनया निंतिं समितिया नामय् ध्यबा जम्मा यायेत कोष लिचिलाच्वंगु समितिं धाःगु दु ।