पाटी विहारय् दिपकंर बुद्ध थापना
थिमि (नेपालभाषा टाइम्स)÷ मध्यपुर थिमिया पाटी विहारय् दिपंकर बुद्ध मूर्ति थापना याःगु दु । स्वयम्भू महाचैत्यया पश्चिमपाखें अवस्थित दिपंकर बुद्धया प्रतिमूर्ति विहारय् थापना याःगु खः । मध्यपुर थिमिया राजमान बाडे व तेजमाया बाडें करिब ७ फुट धिकःम्ह दीपंकरया उगु मूर्ति थापना यानादीगु खः ।
दिपंकरया मूर्ति थापना याःगु लसताय् पाटी विहार सहयोग समितिया ग्वसालय् वंगु छवाः न्ह्यःनिसें सप्ताहव्यापी महापरित्राण पाठ यायेगु नापं थीथी थासय् च्वंगु भजन खलकं ज्ञानमाला भजन नं न्ह्यब्वयाच्वंगु दु ।
सीदुकथं न्हापा फोहर वायेगु व खिखांमुगःया रुपय् दयाच्वंगु उगु थासय् लिपा विहार निर्माण याःगु खः । विहार निर्माणया इलय् हे उगु थासय् शाक्यमुनि व दिपंकरया मूर्ति नं थापना यानातःगु खःसा थौंकन्हय् उगु निगुलिं मूर्ति अन मदु । मध्यपुर थिमिया हे जीवन्त सांस्कृतिक धरोहर श्रीगोपाल प्रजापतिया नेतृत्वय् भिक्षु प्रज्ञाया सल्लाहकथं उगु थासय् विहार निर्माण याःगु खः ।
लिपा स्थानीय समाजसेवी श्यामकृष्ण मानन्धर, धर्मसुन्दर वज्राचार्य, गणेशराम प्रजापति लगायतया कुतलय् विहारय् आवश्यक संरचना निर्माण यानाः व्यवस्थित यायेगु व विहारय् थीथी बौद्ध गतिविधि न्ह्याकेगु जुया वयाच्वंगु खः।
LEAVE YOUR COMMENTS