एमसीसी उपाध्यक्षया दबाब
येँ – अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) या उपाध्यक्ष फतिमा सुमारं एमसीसी सम्झौता सदनं अनुमोदन यायेगु नितिं ग्वाहालि यायेत प्रमुख प्रतिक्षी एमालेया अध्यक्ष केपी ओलीयात इनाप यानादीगु दु ।
प्यन्हुयंकंया नेपाः भ्रमणया नितिं म्हिगः येँय् थ्यंकः वःम्ह सुमारं म्हिगः दकलय् न्हापां हे विपक्षी दलया नेता ओलीयात नापलानादीगु खः । ओली निवास बालकोटय् वनाः वय्कलं एमसीसी सम्झौताय् वयाच्वंगु विवाद व आःया अवस्थाया बारे जानकारी कायेगु कुतः यानादीगु खः ।
लिसलय् अध्यक्ष ओलीं थःगु सरकार दुगु इलय् थम्हं एमसीसी सम्झौता पारित याकेत स्वयागु खःसां सभामुख व मेपिं छुं मनूतय्सं ग्वाहालि मयाःगुलिं सफल मजूगु खँ कनादीगु खः । लिसें वय्कलं आःया अवस्थाय् थ्व विषयय् थः स्वयां नं सत्तारुढ दलया भूमिका महत्वपूर्ण जुइगु खँ नं कनादीगु खः ।
सुमारयात वय्कलं धयादिल, ‘न्हापा जिपिं सरकारय् दुगु इलय् कुतः यानागु खः, छुं पासापिनिगु भूमिकाया कारणं पारित याये मफुत । आः जिपिं सरकारय् मदु, न्हापां सरकारया धारणा वयेमाल ।’ ओलीं एमसीसी सम्झौता बारे सरकारं थःपिंलिसे सहलह मयाःगु खँ नं कनादीगु खः ।
उपाध्यक्ष सुमारं थौं माआवादी अध्यक्ष पुष्पकमल दाहाल, एकीकृत समाजवादीया अध्यक्ष माधव नेपाल, जनता समाजवादी पार्टी संघीय परिषद अध्यक्ष डा. बाबुराम भट्टराईयात नं नापलाइगु ज्याझ्वः दु । उकथं हे प्रधानमन्त्री शेरबहादुर देउवायात नं थौं सनिलया ४ बजे सिंहदरबारय् नाप लाइगु ज्याझ्वः दु ।
सुमार नेपाः वये न्ह्यः एमसीसी बारे नेपाःया जनस्तरय् ब्वलंगु न्ह्यसः सहित सरकारं छ्वःगु पौया लिसः नेपालय् च्वंगु अमेरिकी दूतावासपाखें बिउगु खः । एमसीसी पुचःया नेपाः भ्रमणया झ्वलय् जुइ फइगु विरोध ज्याझ्वःयात ध्यानय् तयाः सरकारं सुरक्षा व्यवस्था कडा याःगु दु ।
एमसीसी प्रदर्शनकारीत ज्वन
अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) सम्झौताया विरोधय् प्रदर्शन याःपिं नेकपा क्रान्तिकारी माओवादीया कार्यकर्तातय्त प्रहरीं ज्वंगु दु । एमसीसी उपाध्यक्ष फतिमा सुमार व सहायक उपाध्यक्ष जोनाथन ब्रुक्सया नेपाः वयेत्यंगु झ्वलय् कोटेश्वरं पिकाःगु जुलसय् ३५ म्हेसित ज्वंगु खः ।
ज्वंपिं नेकपा (क्रान्तिकारी माओवादी) या पोलिटब्युरो दुजः लिसें प्रदेश ३ या सचिव सुरेश श्रेष्ठ, अखिल नेपाल टे्ड युनियन महासंघ (क्रान्तिकारी) या अध्यक्ष ईश्वर तिमल्सिना, महासचिव बसन्त बोगटी, क्रान्तिकारी युवा लिगया अध्यक्ष आकाश महर्जन खः । ज्वंपिंत भृकुटी मण्डपय् च्वंगु नेपाल पुलिस क्लबय् तयातःगु खः ।
LEAVE YOUR COMMENTS