नीलवाराही संरक्षण अभियानया जेसिबीयात जरिवाना

थिमि/मध्यपुर थिमिया नीलवाराही देगः संरक्षणया झ्वलय् चले याःगु डोजर (जेसिबी)यात जरिवाना क्वःछिउगु दु । मध्यपुर थिमि नगरपालिका ९ वडाया ऐतिहासिक देगः संरक्षणया निंतिं स्थानीय वासिन्दातय्‌ुं स्वःस्फूर्त रुपं न्ह्याका वयाच्वंगु श्रमदानया झ्वलय् चा मिले यायेत जेसिबी छ्यःगु खः ।
चाँगुनारायण नगरपालिकां नीलवाराही देगः संरक्षण अभियानं हःगु जेसिबीं अवैध रुपं चा उत्खनन् याःगु धासें जरिवाना क्वःछिउगु खः । चाँगुनारायण नगरपालिकां जेसिबीयात न्यय्‌द्वः तका जरिवाना क्वःछिउगु खः ।
वंगु सोमवाः नीलवाराहीइ चा मिले यायेत डोजर छ्यःगु खः । अवैध रुपं चा उत्खनन् याःगु धासें प्रहरीं जेसिबी नियन्त्रणय् कयाः चाँगुनारायण नगरपालिका वडा नं. २ दुवाकोट लिक्कं च्वंगु दुवाकोट प्रहरी प्रभागय् तयातःगु खः । लिपा अभियानय् लगे जुयाच्वंपिं श्रमदातात जेसिबी लित कायेत वंगु इलय् प्रहरीं जेसिबीया ताःचा नगरपालिकायात लःल्हायेधुंगु लिसः बिउगु खः । वयां लिपा श्रमदातात नगरपालिकाय् वनाः ताःचा काःगु इलय् उकथंया जरिवाना क्वःछिउगु खः ।
प्रहरी नगरपालिकायात आवश्यक कारवाहीया निंतिं धासें छ्वःगु पती दुवाकोट प्रहरी प्रभागया प्रहरी नायब निरीक्षक सन्तोष शिखर कार्कीया नेतृत्वय् वंगु पुचलं अवैध चा उत्खनन् यानाच्वंगुलिं जेसिबी व चालकयात नियन्त्रणय् कयागु व आवश्यक कारवाहीया निंतिं इनाप याना धयातःगु दु ।
अथे हे पती ना.प्र. ०१–००३ क ९१२८ नं.या जेसिबीं अवैध रुपं चा उत्खनन् यानाच्वंगु गोप्य सुचंया लिधंसाय् प्रहरीया पुचः खटे यानागु नं धयातःगु दु ।
जेसिबी धाःसा आतक नं दुवाकोट प्रहरी प्रभागय् तयातःगु दुसा ताःचा नगरपालिकाय् तयातःगु दु ।
स्थानीय वासिन्दा, श्रद्धालु, थीथी खलः, पुचःपाखें स्वतन्त्र रुपं यानाच्वंगु श्रमदानय् अवैध रुपं चा उत्खन्‌न याना यंकूगु धइगु द्वपंयात अभियानलिसें श्रमदातातय्‌सं आपत्ति प्वंकूगु दु ।