बागीश्वरी मा. वि.या पूर्व प्रअ–शिक्षक भेला व सम्मान ज्याझ्वः
ख्वप- बागीश्वरी माध्यमिक विद्यालयं थःगु हिरक जयन्ती दँ–२०७५ या लसताय् विद्यालयया पुलांपिं प्रधानाध्यापक व शिक्षकतय् छगू भेला याःगु दु । भेलाय् मूपाहांकथं झायादीम्ह नेपाल मजदुर किसान पार्टीया अध्यक्ष नारायणमान बिजुक्छें समाजवादी व्यवस्था स्थापना मजूतले शिक्षा पेशा यानाच्वंपिंसं छेँया व्यवहार कः घाये फइमखु धासें हरेक शिक्षकं उगु व्यवस्थाया निंतिं सघर्षशील भावनाया विकास यायेमाः धयादिल ।
शिक्षकं देय् व जनताया हितया निंतिं न्ह्यागु थासय् च्वनाः नं संघर्ष यायेफुम्ह विद्यार्थी उत्पादन यायेगु ज्याय् शिक्षण पेशायात उपयोग यायेमाःगु खँय् बः बियादिसें वय्कलं गलत संगतय् लगे जूपिं विद्यार्थीयात सुधार यायेत शिक्षकतय्सं नियमित रुपं सहलह यानाः समाजयात न्ह्यःने यंकेगुलिइ ध्यान बीमाः धयादिल ।
ज्याझ्वलय् विद्यालयया पुलांम्ह प्रधानाध्यापक मोहनप्रसाद प्रजापतिं थम्हं विगतय् वःगु थीथीकथंया हाथ्यात समाधान यानाः न्ह्याः वनागु चर्चा यासें वइगु दिनय् नं विद्यालयं अज्याःगु हाथ्यायात सन्तुलित रुपं समाधान यानाः न्ह्याः वनीगु खँय् थः विश्वस्त दु धयादिल ।
ज्याझ्वःया सभापति नापं विद्यालयया प्रधानाध्यापक कृष्णप्रसाद धन्छां विद्यालयया प्रगति विवरण न्ह्यब्वयादीगु खःसा पुलांपिं शिक्ष्माक गोविन्दमान सिंह अधिकारी, चन्द्रबहादुर उलक, सहायक प्रधानाध्यापक ज्ञानसागर प्रजापतिं नं नवानादीगु खः ।
उगु इलय् मूपाहां बिजुक्छें विद्यालयया पुलांपिं प्रधानाध्यापकपिं इन्द्रबहादुर प्रजापति, मधुसुदन मास्के, सत्यलाल मधिकःमि, बालकृष्ण श्रेष्ठ, अम्बिकामान मानन्धर व मोहनप्रसाद प्रजापतियात दोसल्लां न्ययकोः हनापौ देछानादीगु खःसा सहायक प्रधानाध्यापक ज्ञानसागर प्रजापतिं पुलांपिं शिक्षकपिंत मतिनाया चिं लःल्हानादीगु खः ।
LEAVE YOUR COMMENTS