‘मन्त्री स्वयां कर्मचारी बल्लाः’

येँ – उद्योग वाणिज्य तथा आपूर्ति मन्त्री मातृका यादवं मन्त्री स्वयां कर्मचारी बल्लाना वनाच्वंगु खँ धयादीगु दु । नेपाल खाद्य संस्थानया ४४ -क्वःगु वार्षिक उत्सवय् न्ववानादिसें वय्कलं उगु खँ धयादीगु खः ।

स्वनिगलय् च्वनाच्वंपिं कर्म–चारीयात स्वनिगलं पिने छ्वयेमफुगु खँ कनादिसें वय्कलं धयादिल, ‘छम्ह कर्मचारीयात सरुवा यायेत स्वल धाःसा न्यय्म्हेसिगु फोन वइगु, गुलि शक्तिशाली जुल कर्मचारी, मन्त्रीयात तकं टेरे याइगु मखु, मेपिनिगु छु खँ ल्हायेगु ?’

कर्मचारीतय् ज्या हे मयाःसा नं तलब
पाके जुइगु जूगुलिं छाय् ज्या यायेगु धइगु मानसिकता

वय्कलं न्ववायेगु झ्वलय् कर्मचारीया कारणं हे संस्थान घाटाय् वंगु द्वपं बियादिसें दछियंकं संस्थाय् अनुचित ज्या यायेगु अले छन्हु पुजा याइगु परिपाटीं संस्थान हे मदइगु अवस्था वयेफइगु खँ कनादिल ।

ज्याझ्वलय् न्ववायेगु झ्वलय् संस्थानया महानिर्देशक योगेन्द्र गौचनं नं कर्मचारी व सञ्चालक समितिं यानाः संस्थान घाटाय् वंगु खँ कनादिल । वय्कलं कर्मचारीं ज्या हे मयाःसा नं तलब पाके जुइगु जूगुलिं छाय् ज्या यायेगु धइगु मानसिकता ब्वलनाच्वंगु धासें संस्थानया दछियंकंया आम्दानी व खर्चया विवरण तकं कायेत थाकुयाच्वंगुलिं थज्याःगु संस्थानं कृषकया ज्या गुकथं याइ धइगु न्ह्यसः नं तयादिल ।